La populaziun da las vischnancas da Tschappina, Urmein e Flerden è vegnida infurmada mardi saira davart il project d'amplificaziun planisà da l'implant d'ennavar. Il president dal cussegl d'administraziun dals Runals da Tschappina-Lüsch-Urmein SA, Hanspeter Grass, ha discurrì d'in pass impurtant en l'avegnir dal territori da skis.
La finamira saja da pudair ennavar cumplettamain las pistas principalas entaifer tschintg fin set dis – enstagl da 15 fin 20 dis sco enfin ussa. Uschia duai vegnir meglierada en spezial la segirezza da naiv sur ils dis da Nadal. Ina part centrala dal project è il lai da Lüsch che proveda cun aua l'indriz d'ennavar. Il lai era vegnì reactivà pir avant trais onns suenter ch'el era stà airi passa tschient onns.
Vischnancas na ston pajar nagut
Il project vegn finanzià da la societad da runals che sa chatta en ina situaziun finanziala solida. Las vischnancas na ston betg sa participar als custs. Per realisar il project è dentant necessaria ina revisiun parziala da la planisaziun locala.
Davart las midadas da zona correspundentas decidan las vischnancas dad Urmein e da Flerden il december, Tschappina il schaner. La suprastanza communala da Tschappina punctuescha l'impurtanza dal project per la regiun: Cun l'engrondiment possia il manaschi da skis vegnir segirà a lunga vista.