Hacher Bernet è da buna speranza. «Entschatta schaner da quest onn avain nus pajà ils ultims leasings», di il directur e represchentant dal cussegl d'administraziun da las pendicularas Tambo a Spleia. El ch'è vegnì avant quatter onns da las pendicularas Madrisa Claustra a Spleia cun l'incumbensa da far urden di dentant er: « Senza l'agid finanzial da dus investurs na fissan nus betg en la posiziun che nus essan ussa.» E natiralmain vulessan ils investurs er vesair in svilup e la finala in gudogn. Quel saja dentant sulettamain pussaivel sche quels e la politica tirian vid ina suga.
Idea è pronta
L'idea dal project da svilup per il turissem a Spleia è pronta. Dapli letgs chauds, la concentraziun dal turissem en in lieu sper la staziun da las pendicularas e tut ord in maun. Impurtant saja ussa tenor Hacher Bernet d'infurmar ed integrar ils pertutgads – sajan quai las diversas organisaziuns d'ambient, il uffizis, la vischnanca sco er ils investurs.
80 milliuns francs
Ch'il svilup dal turissem a Spleia vegn a custar insatge sa chapescha da sasez, resumescha il bab da l'idea Hacher Bernet. El è dentant persvas da pudair porscher in plan attractiv per investurs. Spleia saja ina perla, ina prada prest verda cun bler potenzial e cunzunt er en in lieu optimal tranter Turitg e Milano.
