Albert Kruker n'è betg stà nunenconuschent en la regiun. Dal 2003 enfin il 2009 era el responsabel per il marketing da Savognin. Perquai enconuscha el era la regiun ed è persvas che la regiun porscha insatge per mintgin.
Cun la cultura, la lingua rumantscha, la spierta da sport e la natira avain nus qua in pachet cumplet.
Era sche il nov directur n'ha per dapli che 15 onns betg pli lavurà per la destinaziun, datti anc adina temas e projects che vegnan ad accumpagnar el. Tals projects e temas ch'eran gia actuals, cura ch'el era respunsabel da marketing a Savognin. Sco per exempel: il Parc Ela, Origen u il hotel Cube. Sin quels s'allegra el era, perquai ch'el po cuntinuar là, nua ch'el aveva smess.
Jau n'hai betg in orizont da temp. Entant ch'il fieu per il turissem arda, sun jau cun motivaziun qua.
Albert Kruker surpiglia la posiziun da Tanja Amacher suenter 11 onns. Era el sez aveva lavurà sco directur dal turissem a Lenk-Simmental per 12 onns. Sch'el vegn lura era a restar uschè ditg en il Grischun sco a Lenk, n'ha el anc betg decidì. Entant ch'el ha plaschair vid la lavur, veglia el restar.
