Gian Sonder resta dentant vinavant en suprastanza da l’uniun ch'edescha la gasetta emnila La Pagina da Surmeir. Sonder remplazza là Sandra Baltermia, che sa retira. Reelegids èn er vegnids Flavia Balzer, l’actuar Daniel Dedual ed il cassier Giancarlo Lozza.
Pajament supplemetar
Ultra da quai ha l’URS decidì da sustegnair la Fundaziun Medias Rumantschas FMR cun in import supplementar da 20'000 francs. La FMR ha fatg in deficit l’onn 2024, entant che l’URS ha gì in surpli da var 25'000 francs tar expensas da radund 163'000 francs. Tenor il president partent Gian Sonder pussibilitescha questa contribuziun in sustegn supplementar a la FMR. Quella è responsabla per il cuntegn redacziunal da la Pagina da Surmeir. Il schefredactur David Truttmann ha ditg ch’ins tschertgia vinavant ina redactura u in redactur cun enconuschientschas dal surmiran. Actualmain vegnan publitgads intgins texts en rumantsch grischun, tranter auter era perquai ch’il redactur actual per il Surmeir, Toni Vincenz, na discurria betg surmiran.
Tut resta sco enfin qua
Ina proposta d’in lectur da la Pagina da Surmeir, che vuleva surpigliar la rolla da coordinatur ed organisar in pool da redacturas e redacturs che scrivan regularmain per la Pagina da Surmeir, è gia vegnida refusada da l’URS gia avant la radunanza generala. A la radunanza è questa decisiun vegnida communitgada. L’URS argumentescha ch’il concept preschentà na saja betg cumpatibel cun il contract actual cun la FMR.
