La regenza grischuna sustegn il project che vul revitalisar il Rain Posteriur en Valragn. Ella ha concendì la lubientscha necessaria sco er ina contribuziun chantunala da 138'000 francs.
Il project per revitalisar il Rain Posteriur en il territori Äbi cumpiglia cunzunt il Göriwald che cunfinescha cun la riva dal Rain Posteriur en il vest da Medels. Il Göriwald, zona umida d'impurtanza regiunala, è oz separà cumplettamain dal Rain Posteriur pervia dal letg dal flum approfundà. Il traject da revitalisaziun cumenza immediatamain suenter la sbuccada dal Függschtobelbach e s'extenda fin var 150 meters sur la punt dal Rain Posteriur tar Medels. Il traject ha uschia ina lunghezza da circa in kilometer. La revitalisaziun duai augmentar considerablamain la plivalur ecologica en la regiun. Plinavant è planisà da meglierar la protecziun cunter auas grondas per la via naziunala.
Il chantun quinta da pudair cumenzar cun las lavurs per la revitalisaziun la primavaira 2024. La terminaziun da las lavurs è previsida sin la fin da l'onn 2026. Ils custs totals da quest project vegnan budgetads cun var 7,94 milliuns francs.
