Siglir tar il cuntegn

Header

Navigaziun

Il plan da finanzas dat da discutar en il Cussegl communal.
Legenda: Il plan da finanzas dat da discutar en il Cussegl communal. RTR, Federico Belotti
cuntegn

Vaz Critica envers plan da finanzas

A la davosa sesida dal cussegl communal ha la cumissiun da gestiun da la vischnanca da Vaz crititgà vehementamain il plan da finanzas 2020-2025. Quel cuntegnia sbagls, na saja betg realistic e betg cumplet.

Ins stoppia chalar da siemiar, ha ditg Ernst Meier ch’è commember da la cumissiun da gestiun. Tenor il plan da finanzas preschentà, creschian ils debits d'actualmain 7000 francs per abitant sin 18’000 francs, sche tut vegniss realisà sco publitgà en il plan da finanzas – e quai saja anc la varianta senza ina nova chasa d’attempadas.

President sa defenda

Il president communal da Vaz Aron Moser è sa defendì cunter las rinfatschas. Uschia ha el punctuà ch’il plan da finanzas saja in mussavias cun giavischs che possian, ma na stoppian betg vegnir realisads ils proxims tschintg onns. E las summas menziunadas sajan stimaziuns. Plinavant saja il suveran adina quel, ch’haja il davos pled en chapitel. I na saja en mintga cas betg l’intent da la vischnanca da manar ella en debits memia gronds.

Pass giuridics pussaivel

Sco quai che Ernst Meier ha ditg a l'ultima sesida dal cussegl communal, tschertgian els il contact cun l’uffizi da vischnancas, sch’ins na vegnia betg perina cun la vischnanca pertutgant il plan da finanzas. Ins saja era pront dad ir la via giuridica, uschia Meier.

RR actualitad 17:00