La revisiun da la Lescha federala davart la planisaziun dal territori ch’è vegnida acceptada dal pievel svizzer il 2013, ha ussa era consequenzas concretas per la vischnanca da Vaz: Sco bleras autras vischnancas ha ella memia bleras zonas da bajegiar – ed uss sto ella reducir. Quai vul dir: da las actualmain var 150 parcellas en la zona da bajegiar, ston circa 100 vegnir prendidas ora da la zona.
Vischnanca discurra d'in pass dolorus
«Quai è in pass dolorus», di Mauri Malär, president da la vischnanca da Vaz. El punctuescha dentant er las schanzas che la revisiun porta: «Nus vulain sviluppar la planisaziun locala ensemen cun la populaziun – e promover emprimas abitaziuns.» Tgi che bajegia u renovescha ina abitaziun principala, possia profitar d’in bonus da fin 30 %.
Possessurs da segundas abitaziuns impedeschan project per abitaziuns per indigens
In exempel actual mussa quant difficil ch’igl è da realisar abitaziuns pajablas per indigens: A Valbella impedeschan actualmain recurs da possessurs da segundas abitaziuns in project cun in tal intent. «Quai mussa quant cumplexa che la situaziun è», di Malär. Tuttina saja cler che la vischnanca veglia agir: «Nus stuain crear spazi d’abitar per persunas indigenas. Famiglias giuvnas chattan adina pli grev in dachasa adattà.»
Adattà al tema:
Era a La Punt Chamues-ch impedeschan possessurs da segundas cun in recurs la fabricaziun d'abitaziuns per indigens:
Quartiers en il center profiteschan
La nova strategia da la vischnanca prevesa ina concentraziun da la construcziun en lieus centrals – las regiuns perifericas duain vegnir reducidas. Walter Büchi, manader da l’uffizi da construcziun, declera: «Pli datiers dal center che la parcella è, pli gronda è la schanza ch’ella resti en zona da bajegiar. Nus avain examinà mintga singula parcella.» Ils criteris d’evaluaziun sa basan sin las directivas dal chantun e dal Cussegl federal, ma laschan era spazi da metter accents locals.
Betg anc cler cura ch'i vegn votà
En il rom da la procedura da participaziun publica pon abitantas ed abitants exprimer lur opiniuns enfin la fin da matg. Suenter vegn la populaziun a votar davart la nova planisaziun locala. Ina realisaziun definitiva pudess ir en vigur il pli baud il 2026.