La «Villa Alva» daventa in center cultural plain colurs: Ella vegn sanada cumplessivamain e duai en l'avegnir cumbinar istorgia, giudiment e migraziun. Oz èn las lavurs da renovaziun vegnidas lantschadas.
Dapi quest enviern è la chasa mess en puntanadas ch'èn vegnidas concepidas sin basa enconuschientschas da la tgira da monuments davart las colurs da la Villa Alva. Perquai che la Villa Alva a Mulegns stat avant ina transfurmaziun fundamentala. Quai che valeva ditg sco simpel bajetg alv sa mussa sco chasa surprendentamain plain colurs.
«Nus discurrin da lila, ocher, terracotga e verd intensiv», di Giovanni Netzer da la Nova Fundaziun Origen. Actualmain vegnan scuvertas veglias stresas da colur per restabilir la furmaziun oriunda uschè autentica sco pussaivel.
-
Bild 1 von 8. La Villa Alva en la puntanada plain colurs. Bildquelle: Nova Fundaziun Origen.
-
Bild 2 von 8. Bildquelle: Nova Fundaziun Origen.
-
Bild 3 von 8. Las colurs ch'èn vegnidas scuvertas sut la fatschenta alva. Bildquelle: RTR.
-
Bild 4 von 8. Bildquelle: Nova Fundaziun Origen.
-
Bild 5 von 8. La vischnanca da Mulegns cun la Villa Alva amez il vitg. Bildquelle: Nova Fundaziun Origen.
-
Bild 6 von 8. La vischnanca da Mulegns cun la Villa Alva amez il vitg. Bildquelle: Nova Fundaziun Origen.
-
Bild 7 von 8. Il president communal Daniel Wasescha. Bildquelle: RTR.
-
Bild 8 von 8. Bildquelle: Nova Fundaziun Origen.
L'istorgia da la villa è spectaculara: Avant radund sis onns è ella vegnida salvada da la spazzada e spustada per otg meters. Oz stat il bajetg sut protecziun da monuments e vegn uss sanà per radund 3,6 milliuns francs. Planisà è in museum da pastiziers cun café e manufactura.
La villa duai raquintar l'istorgia dals emigrants grischuns ch'han gì success sco pastiziers en l'Europa – ed a medem temp drizzar l'egliada en l'avegnir dal mastergn.
L'interiur da la Villa Alva
-
Bild 1 von 3. In local spezial vegn ad esser la «stanza d'argient», deditgada a la traglischanta pastiziera Norina Gilli. Bildquelle: Nova Fundaziun Origen.
-
Bild 2 von 3. Bildquelle: Nova Fundaziun Origen.
-
Bild 3 von 3. Bildquelle: Nova Fundaziun Origen.
Finanzià vegn il project per gronda part tras daners publics, fundaziuns e contribuziuns privatas. Radund in milliun francs manca anc, ha ditg Giovanni Netzer sin dumonda. La vischnanca da Surses sustegna l'intent e spera ch'i dettia impuls per il turissem e l'economia.
Ina dumonda da sa participar finanzialmain vi da la renovaziun n’haja betg dà fin ussa – ha ditg Daniel Wasescha, il president communal da Surses. In local spezial vegn ad esser la «stanza d'argient», deditgada a la traglischanta pastiziera Norina Gilli.
Las lavurs da fatschada duain esser terminadas fin l'atun, l’enviern vegnan fatgas las lavurs en l’intern dal bajetg. l'avertura è previsa – sche tut va tenor plan – entaifer in onn.
Ina chasa veglia cun ina istorgia ritga
L'onn 2020 era in onn spezial per la Villa Alva ch'è stada ina giada directamain a la via principala a Mulegns. Per ina sanaziun da la via envers il pass da Güglia aveva la chasa da far lieu ella è vegnida spustada – e quai entirs otg meters.
La proposta per il spustament è vegnida da la Nova Fundaziun Origen che posseda la Villa Alva. Il project da var 5,6 milliuns francs era sustegnì dal chantun e gida, tenor Giovanni Netzer il intendant d'Origen, a mantegnair l'istorgia e la cultura da la vischnanca da Mulegns.