Dapi il 1999 enfin quest onn è il Grischun dal sid, pia las valladas talianas e l'Engiadina, adina stadas represchentadas en la regenza Grischuna. Ils ultims onns cun Jon Domenic Parolini, avant cun Barbara Janom Steiner e Claudio Lardi. Il 2027 cumenza pia ina nova legislatura senza in politicher u ina politicra che represchenta d'ina vart la regiun periferica e da l'autra vart er la trilinguitad da las valladas Engiadina, Val Müstair, Puschlav, Bregaglia, Calanda e Mesauc.
Schelta avess il suveran però gì la dumengia d'elecziuns. Gist quatter da nov persunas ch'èn sa messas a disposiziun eran dal Grischun dal Sid. Tanschì n'hai però betg per Nora Saratz Cazin (PVL, Puntraschigna), Aita Zanetti (Center, Scuol), Maurizio Michael (PLD, Bregaglia) e Reto Bott (senza partida, S-chanf). Sche las candidaturas han concurrenzà ina l'autra, stoppian ins uss analisar, han ditg las candidatas ed ils candidats, curt suenter ch'igl era cler che Valérie Favre Accola è elegida.
Era la populaziun da l'Engiadina avess gì gugent in represchentant u ina represchantanta engiadinaisa en la regenza. Quai din diversas persunas che RTR ha inscuntrà sin via. Ils ins vesan quai sco dischavantatg, ils auters relativeschan però er e din ch'auters hajan da represchentar ils interess da las regiun - quai saja l'incumbensa dals deputads e da las deputadas en il Cussegl grond. Il cusseglier u la cussegliera guvernativa stoppia represchentar l'entir chantun.
Sforz dal parlament e da la regenza
Ils politichers da l'Engiadina èn d'accord ch'igl è donn che la regenza grischuna n'ha nagina represchentanza dal Grischun dal Sid. Uss saja il pensum dal parlament da tegnair en egl che tant questas regiuns sco er la trilinguitad na vegnian betg a la curta. Quai è l'avis da la deputada socialdemocratica dal Cussegl grond Franziska Preisig. Il cusseglier guvernativ engiadinais Jon Domenic Parolini - ch'è anc en uffizi enfin la fin da l'onn - di che tut ils commembers da la regenza stoppian represchentar e politisar per tut las regiuns dal Grischun.
Sch'ins ha la perspectiva d'ina vallada perifera, lura influenzescha quai era las decisiuns. Questa experientscha hai jau adina puspè fatg.
Parolini spera ch'ins possia curreger la constellaziun en la regenza la proxima giada ch'i dettia ina vacanza. Ch'in cusseglier u ina cussegliera guvernativa sto represchentar e far politica per l'entir chantun, di er il cusseglier naziunal da la PS Jon Pult. El deplorescha era che la regenza ha a partir dal 2027 nagin da las valladas dal sid. I saja però era da respectar la decisiun dal suveran.
