In anteriur funcziunari da scussiun e concurs grischun è vegnì arrestà en l'Italia. Quai suenter ch'ins ha tschertgà el per quatter onns. Encunter el investighescha la procura publica dal Grischun dapi 10 onns. El duai avair defraudà daners en l'autezza da radund 500'000 francs, avair manà l'uffizi da moda malfidaivla ed avair commess delicts da facultad e sfalsificaziun - quai durant il temp dal 2006 al 2016. Quai ha la procura publica dal Grischun confermà envers RTR. Pertutgads e donnegiads sajan tant privats sco era autoritads publicas communalas e chantunalas.
Dapi il 2020 tschertga la procura era sin nivel internaziunal
L'october 2020 aveva la procura publica grischuna relaschà in cumond d'arrest internaziunal encunter l'um ch'è ussa vegnì arrestà en l'Italia. Sco proxim suonda ina dumonda d'extradiziun via l'Uffizi federal da giustia per mauns da las autoritads da l'Italia. Dapli detagls na publitgescha la procura betg – tenor atgnas indicaziuns per betg influenzar las investigaziuns.
Suenter 9 onns fugia en ils mauns da las autoritads
L'um da 70 onns saja vegnì arrestà en in ospital en la provinza taliana Latina, nua ch'el eria stà per in tractament, ha rapportà l'agentura da novitads taliana ANSA l'emna passada. L'arrestaziun saja succedida ils 8 da zercladur, ha confermà l'Uffizi federal per giustia.
Betg confermà è in connex cun l'Engiadina
Betg confermads èn anc rapports da medias ch'i sa tractia tar l'um d'in anteriur funcziunari da l'uffizi da scussiun e concurs en l'Engiadina. Plirs indizis laschan supponer ch'i sa tractia da l'um che vala sco sparì dapi 9 onns. In ulteriur indizi: In'annunzia da spariziun d'in um che la polizia aveva publitgà l'onn 2017 è dacurt svanida da la rait. L'um aveva da quel temp 61 onns ed era vegnì vesì l'ultima giada a La Punt Chamues-ch.
