Sch'insatgi dumonda la permissiun da dimora en il chantun Grischun duai esser pussaivel da pretender in extract dal register penal – quai almain en singulas regiuns e sch'i dat ina situaziun extraordinaria. Actualmain vai per il cumbat cunter la criminalitad organisada en il Mesauc.
Enfin uss aveva il cusseglier guvernativ, Peter Peyer, adina sclaus questa pussaivladad, cunquai ch'ella cuntrafetschia a la cunvegna cun l'UE davart la libra circulaziun da persunas.
Novas analisas da l'Uffizi chantunal da migraziun e dal dretg civil mussian dentant ch'i dettia ina tscherta libertad d'agir – sche la situaziun pretendia quai.
Sche nus vesain che la segirtad è periclitada en il Mesauc alura pudain nus pretender in extract da tut las persunas che vulan sa chasar là.
Ma er sch'i dat tschertas libertads d'agir - sco per exempel en il cumbat cunter la criminalitad organisada accentuescha Peter Peyer ch'ins sa chattia anc en la fasa d'analisa.
Sche las analisas da l'uffizi sajan positivas, possian ins introducir l'obligatori regiunal per in extract «per immediat». I na dovria nagina midada d'ina lescha u d'ina ordinaziun. Il chantun possia simplamain dar il cumond ch'i dovria en tschertas regiuns in extract dal register penal per in permiss da dimora B.
Era tema a Berna
La dumonda da l'extract dal register penal occupa er il Cussegl naziunal. Quel ha approvà la mesemna passada ina moziun che pretenda ch'ins suondia al chantun Tessin e pretendia da mintga persuna estra che fa la dumonda da lubientscha da dimora er in extract dal register penal.
La moziun vegn da la Partida populara svizra. Quella di ch'il cas da Roveredo mussia a moda exemplarica ch'il sistem tessinais funcziunia. Il mafioso, che saja vegnì arrestà en il Mesauc en connex cun in'acziun encunter drogas, n'haja avant betg survegnì la lubientscha da dimora en il Tessin – en il Grischun dentant bain.