Grazia al boom da turissem «èn las cifras creschidas a moda nunditga», conferma il president da vischnanca da Como Alessandro Rapinese envers il Telegiornale da RSI. Como è anc adina ina destinaziun populara e bainstanta.
Sulettamain en la citad èn vegnids averts dapli che tschient restaurants novs. In dumber che s'augmenta sin 500 en l'entira provinza. Ina creschientscha che sa manifestescha en bainstanza ed occupaziun, ma che ha era ristgs, sco Alessandra Dolci, la coordinatura da la Direcziun districtuala dal cumbat cunter la Mafia a Milaun ha confermà. «Jau chat era normal che la purschida commerziala per turists è creschida. Jau na vuless betg demunisar in sectur propi impurtant», di Dolci.
«Jau poss dentant dir cun la medema segirezza che la provinza da Como è anc adina object da nossas investigaziuns, cunquai che la criminalitad, oravant tut da la Calabria, è enragischada fermamain dapi 50 fin 60 onns. Perquai na poss jau betg excluder che intgins da quests affars stattan interess mafius.»
Era l'uniun da commerzi da Como è alerta, sco ch'il vicepresident Claudio Bizzozzero declera: «En egl dat ch'i dat en tscherts cas averturas fitg sveltas cun fitg grondas investiziuns da persunas che n'èn betg enragischadas en la regiun. Nus na vulain inculpar nagin, quai na vul dir nagut, ma i dat motivs dad esser precauts. En nossa regiun èn las activitads da la giustia stadas fitg frequentas durant decennis, spezialmain sch'ins patratga vid l'organisaziun da mafia 'ndrangheta, ed i ha dà resultats impurtants. Jau schess che nus pudain esser calms era vinavant.»
Er il president da vischnanca da Como, Alessandro Rapinese, s'exprima davart quest tema: «Il tema sco tal è ch'ins sto adina promover l'economia reala, damai quels che fadian lur daners cun vender cappuccinos e Brioches. E betg quels che ston vender millis da capuccinos e brioche per forsa lavar daners ed investir resursas che derivan da retgavs da drogas u dad autras chaussas.»
In fenomen che sto era vegnir tegnì en egl en il Tessin, di la coordinatura da la Direcziun districtuala per cumbatter la Mafia a Milaun: «Jau pens che era vus stuais avrir tut las antennas e percorscher ils signals d'alarm per la preschientscha da mafiosi. Pertge che las ultimas retschertgas, a las qualas nus essan stads participads ensemen cun las autoritads svizras, mussan ch'i sa tracta plitost da daners che da drogas. Jau stoss dir che era vossa regiun n'è segiramain betg immuna cunter ils desideris da la mafia.» Ils ultims onns è la collavuraziun tranter Berna e las autoritads talianas d'anti-mafia daventada pli frequenta, conferma la procuratura Dolci.
Or da l'archiv: