Ils turistichers e las hotelieras èn fitg cuntentas cun l’entschatta da la stagiun auta. Las cifras sajan bunas – gea schizunt fitg bunas. Ernst Wyrsch, president da Hotellerie Suisse Grischun, discurra perfin d’ina entschatta spectaculara.
Jau sun fitg cuntent. Nus avain gì 6% dapli giasts che l’onn passà.
Dapli glieud e cunzunt dapli glieud che haja gust da dar ora raps. Uschia saja era la svieuta per chau creschida, di Ernst Wyrsch. D’engraziar saja quai cunzunt a giasts internaziunals ed oravant tut a turists e turistas americanas. Prest 4% dapli giasts ord l’America hajan passentà qua lur dis da vacanzas. Quai saja simplamain grondius.
Sper ils giasts internaziunals cun las bursas grondas saja quest success cleramain era d’engraziar a la bun'aura, a la pussaivladad da far naiv artifiziala – ed era a la buna purschida sper las pistas.
Il hotelier modern fa bler per in program alternativ. Il pli aut principi da nus turistichers è: i na dastga betg vegnir lungurus.
Per curturella han era diversas purschidas en Surselva procurà. Kevin Brunold, mainafatschenta da Surselva turissem, è fitg cuntent cun las davosas duas emnas.
Nus avevan diversas fieras e bun'aura. La glieud pareva fitg cuntenta malgrà pauca naiv.
Pretschs auts per ina purschida limitada: giustifitgà?
Sin la naiv spetgan era las pendicularas per uschia pudair porscher dapli kilometers da pista, ubain insumma pudair avrir il territori da skis. Ina discussiun che ha il davos temp procurà per critica: pretschs cumplains per chartas dal di per ina purschida pli pitschna – è quai insumma giustifitgà? En Surselva per exempel hajan bleras pendicularas reducì ils pretschs, per part enfin 20%, sco Kevin Brunold declera. Quai saja tenor el ina buna decisiun, e tuttina...
Las pendicularas han dà tut per pudair tegnair avert il territori cun blera investiziun en naiv artifiziala. E senza quellas entradas vegn quai grev.
Reclamaziuns haja prest dà naginas, la glieud haja acceptà la situaziun e saja la fin finala stada leda dad insumma pudair ir cun skis, uschia Kevin Brunold. Pretschs cumplains per ina purschida limitada, qua saja da star attent, sco Ernst Wyrsch di:
I va prest memia bain cun il turissem en il Grischun. E quai na fa per regla betg bain al turisticher. Qua èsi da star attent.
Che las pendicularas vulan sur ils dis da festa profitar uschè bain sco mo pussaivel quai saja cler – e tuttina saja da dar adatg, uschia il president da la hotellaria grischuna. La stagiun auta: ella ha cumenzà «spectacularmain» per il turissem Grischun – quai è senza naiv natirala.