La vischnanca da Roveredo en il sid dal Grischun è stada dimora da quatter mafiosis. Ch'ils delinquents han insumma pudì abitar en il Grischun, e quai cun in permiss da dimora B, pia gia bunamain sco in indigen, sveglia dumondas. Il chantun ha intercurì quest cas ed è vegnì a la conclusiun che l'Uffizi da migraziun haja agì correct cun dar als mafiosis ina permissiun da dimora. Quai ha il chantun communitgà la mesemna. L'avis dal chantun Tessin che quellas persunas sajan probabel involvidas en cas criminals, saja pir vegnì enconuschent suenter ch'ins ha gia dà las lubientschas, scriva il chantun.
Era l'Uffizi federal da polizia (fedpol) saja sa drizzada al chantun. L'Uffizi da migraziun Grischun ha dentant decis da betg retrair als mafiosis lur permissiuns da dimora, perquai che lez avess pudì periclitar las investigaziuns, di l'uffizi.
Actualmain examineschia l'Uffizi chantunal da migraziun en cunvegnientscha cun il Fedpol sche la permissiun da dimora da las persunas arrestadas duai vegnir revocada. Cunquai ch’i sa tracta d’ina procedura currenta, na possian betg vegnir communitgads ulteriurs detagls.
Sco Peter Peyer, cusseglier guvernativ dal Grischun, vegn cità en la communicaziun, mussia il cas «quant impurtant ch’igl è che las collavuraturas ed ils collavuraturs en las differentas autoritads èn sensibilisads per il tema da la criminalitad organisada», ma tuttina dettia tscherts cunfins:
Las autoritads ston sa tegnair vi da la basa legala.
Il tema da la criminalitad organisada na pertutgia lunschor betg mo il chantun Tessin u il Grischun, mabain l’entira Svizra, di Peyer vinavant. La criminalitad organisada na stettia betg airi als cunfins.
Cunter criminalitad organisada – quels mancos regian actual
La razzia da drogas internaziunala, nua ch’er in um sesent a Roveredo è vegnì arrestà, porta la tematica dal cumbat cunter la criminalitad organisada en discussiun. Per cumbatter la criminalitad organisada èsi l’emprim necessari d’identifitgar quella. Lura dovran las autoritads ils meds legals vitiers. En quest reguard vesa il schef dal departament da giustia, segirtad e sanadad differents mancos.
Sch’ina persuna burgaisa da la Uniun europeica dumonda per ina lubientscha da dimora B en il Grischun, n’ha il chantun betg la pussaivladad da pretender in extract dal register penal. La cunvegna davart la libra circulaziun da persunas impedescha quai. Tenor Peter Peyer duvrassi ina midada da lescha sin plaun federal u schizunt ina midada d’artitgel en la cunvegna cun la UE.
Da cuntanscher quai, dastgass esser grev.
La Confederaziun è il mument vid elavurar per l’emprima giada ina strategia svizra cunter la criminalitad organisada. Quella è bain anc en lavur, i dat però gia divers cussegls da la Polizia federala (fedpol) per mauns dals chantuns. I sa tracta da mesiras ch’ils chantuns pon realisar senza u er cun midar la basa legala. Tals cussegls veglia il chantun evaluar sco proxim.
In ulteriur manco pertutga il barat d’infurmaziuns tranter las polizias chantunalas aifer la Svizra. Il barat da datas tranter las polizias chantunalas saja pli restrenschì ch’il barat da datas cun polizias da l’exteriur, tradescha Peyer.
Per cumbatter la criminalitad organisada aifer la Svizra è quai in problem.
Per far frunt a la criminalitad organisada duvrassi en pli dapli resursas – en il grond stil. Cunquai ch’il cumbat da criminalitad organisada pertutga ils pli differents champs, giavischass Peyer dapli persunal en ils differents uffizis, quel per migraziun, da commerzi, dal register funsil, per industria, mastergn e lavur, tar la Polizia chantunala sco er tar la Procura publica e la finala er tar la Confederaziun.
Roveredo pretenda meglras controllas e communicaziun dal chantun
La vischnanca da Roveredo aveva tramess ina brev a Cuira. En quella pretenda ella dapli attenziun en connex cun conceder permissiuns da dimora – en spezial, sch'i sa tracta da persunas ch'èn gia prechastiadas. Il vicepresident da la vischnanca da Roveredo è stà tut auter che cuntent, suenter ch'igl è vegnì scuvert che quatter da quels han vivì en lur vischnanca, sco el ha ditg envers la televisiun da la Svizra taliana (RSI)
A noss avis manca cunzunt la conscienza che persunas cun in tal register penal pon obtegnair uschè simpel ina permissiun B sin terren svizzer.
En pli damai ch'in auter chantun l'aveva refusà, ed in terz chantun era gia curt avant concluder l'expulsiun or da la Svizra. Uschia ch'els sa dumondan en vischnanca: «Co è quai pussaivel en il Grischun?»
La dumonda sa drizza a l'Uffizi da migraziun dal chantun Grischun. Tenor las enconuschientschas ch'èn avant maun duai in dals quatter arrestads avair survegnì ina permissiun B malgrà ch'el aveva chastis precedents. Avant aveva il chantun Tessin refusà quai.
Las autoritads communalas da Roveredo èn da l'avis che quai na saja betg acceptabel. En la brev che cumpiglia set paginas pretendan els in'integraziun pli intensiva da las vischnancas ed in barat d'infurmaziuns pli intensiv tranter ils chantuns. Mo uschia pudessan vegnir evitads cas sumegliants en il futur.
Betg mo lavà daners – Rapport RSI dals 16.03.2026
Avant intginas emnas era vegnì enconuschent ch'ils investigaders dad Europol han fatg ina razzia simultana en Frantscha, l'Italia ed en Svizra – ed arrestà set persunas, quatter da quellas en Frantscha e trais en l'Italia. Las inquisiziuns èn vegnidas coordinadas dad Europol: involvà è er stà l'Uffizi federal da polizia (Fedpol).
Sco la televisiun da la Svizra taliana (RSI) aveva scuvert avevan quatter da questas persunas lur domicil a Roveredo en il Mesauc. Tuttas cun ina lubientscha da dimora B. Quai entant che quels vegnivan tractads dad Europol sco finamira gronda e vegnivan tschertgads.
I sa tracta dad in um da 52 onns e ses figl da 24 onns. Era a Roveredo ha abità la partenaria da 37 onns da l'um da 52 onns. Ella è la figlia dad in um da Montenegro ch'è medemamain vegnì arrestà tar questa acziun. El saja stà ina finamira gronda ed è vegnì tschertgà en l'entira Europa. Plinavant è vegnì arrestà in Talian da 44 onns ch'ha abità a Roveredo en ina chasa dasperas.
Fatschentas cun cocain e lavada da daners
L'acziun gieva cunter ina rait da commerzi cun cocain internaziunala che vegn manada da la Camorra napolitana e la 'Ndrangheta calabresa.
Las investigaziuns han cumenzà gia avant dus onns, suenter che las autoritads svizras avevan survegnì in avis sin in burgais talian. Sco quai ch’igl è sa mussà, ha quel lavà daners a l'engronda per la mafia.
En connex cun las investigaziuns han las autoritads internaziunalas, tranter quellas era la Procura publica federala svizra, scuvrì in sistem da cuntrabanda cun cocain. Las drogas vegnivan cun ina bartga or da l'America dal Sid e vegnivan lura transportadas en autos da luxus.
Las entradas èn vegnidas lavadas cun agid da firmas, quints sfalsifitgads ed investiziuns en immobiglias. L'Uffizi federal da polizia Fedpol ha fatg pliras perquisiziuns da chasas en il Grischun ed en il Tessin ensemen cun las polizias chantunalas. Sin il territori svizzer n’è dentant vegnì arrestà nagin.