1'234'000 euros è l'import total che duai esser ì tranter ils onns 2022 e 2024 – tenor ils investigaders talians – sur ils contos da la societad a Roveredo, ch'è vegnida duvrada per lavar ina part dals gudogns dal commerzi internaziunal cun drogas. Quest commerzi è vegnì interrut il favrer cun l'operaziun «Pozzo» (munta: funtauna). Tschients kilos da cocain che la gruppa arrestada ha importà da l'America dal Sid sa basond sin il clans da la N'drangheta e da la Camorra.
Las actas d'investigaziun reconstrueschan detagliadamain ils currents finanzials tranter il Grischun e Napoli, nua che la societad anonima da la Mesolcina aveva in domicil accessoric. Exact là sa chattavan per casualitad er trais da las societads che faschevan transfers en Svizra. Societads ch'ins ha pudì attribuir, sco tar quella da Roveredo, a las persunas arrestadas u persunas colliadas cun lezzas.
Ils pajaments duain esser vegnids fatgs sin basa da quints fictivs che sa referivan a prestaziuns betg existentas. Ils inculpads duain alura avair lavà ils daners cun cumprar vehichels ed immobiglias.
Tranter auter ina villa a Canobbio ch'è vegnida cumprada l'october 2023 per 1,65 milliuns francs. La glista cumpiglia er ina abitaziun a Roveredo, in cumplex d'immobiglias en Frantscha (en las Alps maritimas) e trais immobiglias en las provinzas Napoli e Salerno. Tut ensemen per ulteriurs 2,5 milliuns euros.
Betg d'emblidar ils autos cun numers grischuns: in Porsche Macan, in Land Rover Evoque, in Fiat 500 Abarth ed in Smart Forfour. La finala han las autoritads ordinà da confiscar trais contos da banca svizzers.