- L'Institut federal per la perscrutaziun d'aua Eawag po far conclusiuns davart il consum da drogas svizzer sin basa d'analisas da l'aua persa.
- Qua sa mussa in cler augment tar il consum da chetamin.
- Tar il consum da crystal meth sa mussa dentant ina reducziun.
Il portal da monitoring da substanza Dromedario èn vegnidas publitgadas novas cifras dals emprims dus quartals da l'onn 2025.
Per expertas ed experts sajan spezialmain interessants ils svilups da questas substanzas, per las qualas ch'i na dat naginas cifras u mo cifras da vendita malsegiras, sco la Eawag ha declerà en ina communicaziun. Tenor il motto «L'aua persa na manzegna betg», pon els concluder da las datas da l'aua persa sin il muster, l'augment u la sminuziun dal consum en la societad.
Dapli chetamin la fin d'emna
En egl dat tranter auter in cler augment dal chetamin en l'aua persa. Il chetamin è in anestetic che vegn duvrà en instituziuns medicinalas. El vegn dentant er malduvrà, en spezial en la scena da clubs e raves, nua ch'el è enconuschent sco «k» u «keta».
Spezialmain autas èn las quantitads a Turitg: las valurs da chetamin en las auas persas da Turitg èn cleramain pli autas che quellas en la media da tut ils 10 lieus d'examinaziun en Svizra.
Tge cumpart che sa basa sin il diever medicinal e tgenina sin il diever abusiv na mussan las datas betg. In indizi pudess dentant esser che las valurs da chetamin en l'aua persa da Turitg èn bler pli autas la fin d'emna che durant ils lavurdis.
Bler crack en l'aua persa a Cuira
In maletg sumegliant sa mussa tar crack. Mesirà en l'aua persa na vegn betg il crack sez, mabain ils AEME (anidroecgonine Methyl Ester), in product da decumposiziun (Abbauprodukt) da crack. Er là èn las valurs creschidas cleramain l'onn 2025.
Sper Turitg èn er las valurs a Cuira cleramain sur la media svizra. Er qua pon ins constatar ina differenza remartgabla tranter ils dis durant l'emna e las fins d'emna: las fins d'emna èn las valurs da l'aua persa cleramain pli autas che durant ils lavurdis.
Cuntrari a quai mussa l'analisa da l'aua persa ch'il consum da metamfetamins, er enconuschent sco crystal meth, sa reducescha levamain. Crystal meth vala sco ina da las drogas las pli privlusas sin il martgà. Dapi il cumenzament da las mesiraziuns l'onn 2021 sa mussa en tut la Svizra ina leva reducziun da las valurs da metamfetamin en l'aua persa.
In maletg sumegliant sa mussa tar cannabis: las valurs dal product da decumposiziun THC-COOH, che po vegnir cumprovà en l'urin da persunas suenter che quellas han consumà cannabis, èn durant ils emprims dus quartals da l'onn 2025 en las auas persas in zic pli bassas che durant ils onns passads.