Actualmain saja la situaziun economica en Grischun stabila. Per exempel èn il 2024 vegnids 5,5 milliuns giasts en Grischun – quai è en la media dals onns avant. Per ils proxims onns fa Jürg Schmid, il president da Grischun Vacanzas quint cun ina via crappusa. Quant intensiv e quant ditg na sa el dentant betg.
La probabilitad ch'i vegn a stgadanar en l’economia mundiala è gronda. Ch’ins vegn a sentir quai er en Grischun n'è betg d’excluder.
Gronda part da giasts da la Svizra
In avantag saja tenor el, che blers giasts da la Svizra fan vacanzas en Grischun – circa 70%. En pli na sajan ils Stadis Unids per il mument betg propi dumandads sco destinaziun. Forsa che quests giasts vegnan en Grischun, quai sa savess era imaginar Ernst Wyrsch, el è il president da Hotelleriesuisse Grischun. En mintga cas vegnan las decisiuns e novitads che vegnan di per di da la regenza americana persequitadas.
Kevin Brunold, il mainagestiun da Surselva Turissem ed era Maurus Blumenthal da la societad da masteranza crain ch'il Grischun saja preparà per las sfidas. Surtut pervia las crisas precedentas sco la pandemia da corona hajan ins emprendì da tegnair ensemen. Pia saja il Grischun fit. Quai la resposta sin la dumonda che Marcus Caduff, il manader dal departament d’economia ha fatg oriundamain. Er el crai ch’il turissem saja preparà, ins stoppia dentant adina luvrar ed investir vinavant.
Ferm franc fa quitads
Mintga aspect na po dentant betg vegnir controllà dal Grischun. Per exempel è il ferm franc svizzer ina malsegirtad en futur. Quel è numnadamain dapi onns ferm e daventa adina pli ferm. Memia ferm na duai il franc svizzer dentant betg vegnir, uschiglio èn ils pretschs betg pli attractivs per giasts da l’ester.