Siglir tar il cuntegn

Header

cuntegn

Grond plus da pernottaziuns Ernst Wyrsch: «Quest augment è extraordinari»

L'emprim mez onn dal 2022 han ils hotels grischuns nudà ina meglra occupaziun dals letgs, cumpareglià cun l'onn avant. Var 30% munta il plus, sin passa 2,8 milliuns pernottaziuns, sco l'Uffizi per economia e turissem dal Grischun scriva. Las cifras autas sajan surprendentas.

Il pli grond plus han las destinaziuns grondas fatg. Var 40% dapli pernottaziuns han nudà Engiadina/San Murezzan, Tavau/Claustra ed Arosa. En l'entira Svizra hai dà anc in pli ferm augment da pernottaziuns ch'en il Grischun. Per 47% èn las cifras s'augmentadas, cumpareglià cun l'onn 2021.

HotellerieSuisse è surprais

Er il sguard sin las cifras dal mais zercladur mussa in fitg bun resultat: Cun passa 370'000 pernottaziuns hai dà en Grischun var 20% dapli pernottaziuns en congual cun il zercladur 2021. Quest resultat saja surprendent – atgnamain avevan ins quintà cun pli paucas pernottaziuns. Quai ha ditg Ernst Wyrsch, president da HotellerieSuisse Grischun envers il schurnal regiunal dad SRF.

audio
Ernst Wyrsch davart ils motivs per l'augment
ord Actualitad dals 05.08.2022.
laschar ir. Durada: 2 minutas 23 Secundas.
A mai mancan in pau ils pleds, quels resultats èn extraordinaris.
Autur: Ernst Wyrsch president da HotellerieSuisse Grischun

Ina decleraziun pussibla saja, ch'i ha dà dapli giasts ch'èn vegnids a curta vista. In'autra decleraziun saja la bun'aura: Cun relativamain pauca naiv e temperaturas agreablas ha la stagiun da viandar e dad ir cun bike pudì cumenzar pli baud. Las autas cifras da pernottaziun dals ultims mais sajan in bun indicatur, ch'er ils ulteriurs mais da stad vegnan buns. I giaja perfin en direcziun d'ina stad da record, uschia Ernst Wyrsch. Tge ch'ins stoppia dentant er vesair è che la branscha patescha d'ina mancanza da persunal.

RTR novitads 09:00

Artitgels legids il pli savens

Scrollar a sanestra Scrollar a dretga