Ir sin pista n'è betg stà optimal il december, ed era sin las loipas betg dapertut. Tuttina han ils hotels grischuns dumbrà il december 2022 radund 5% dapli osps che l'onn passà. Dentant betg dapertut, il resultat variescha, sco Ernst Wyrsch, il president da Hotelleriesuisse Grischun declera.
Spezialmain hotels sur 1'400 meters hajan profità surproporziunalmain e quels pli a bass han dumbrà pli paucs osps.
Ils motivs per quai plus èn tenor Wyrsch cunzunt il desideri da puspè ir en la muntogna suenter corona e da fugir da la tschaghera en la bassa. En ils auts èsi numnadamain stà fitg sulegliv il december.
Quitads fa Ernst Wyrsch uss dentant per il schaner. El roga per la naiv. Sch'i dat l'entir mais nagina naiv quinta il president da Hotelleriesuisse Grischun cun in minus d'osps da passa 10%.
