La Confederaziun ha publitgà dacurt las novas cifras a reguard ils cunfinaris e cunfinarias che rivan en Svizra per lavurar. En l’emprim quartal da l’onn èn quai 399’000, in augment da 4,3 %.
Er en il chantun Grischun s’è augmentà il dumber da lavurers da l’exteriur sin 10’671, quai è in plus da 12 %. Remartgabel è che 90 % dals cunfinaris e cunfinarias derivan da l’Italia. Per l’economia saja quel agid che vegn d’ordaifer il cunfin svizzer important, uschè il cusseglier guvernativ Marcus Caduff.
L’avantatg è che nus vegnin d’occupar las plazzas da lavur, per che l’economia possia crescher e funcziunar. Il disavantatg è però ch’ils cunfinaris n’abitan betg en ils vitgs e na fan betg part a la vita sociala en quels.
Blers cunfinaris en Engiadina
Tenor cifras ord la statistica da la Confederaziun quintan las vischnancas en Engiadin’Ota las pli bleras cunfinarias e cunfinaris che vegnan da l’Italia en val a lavurar. Il pli grond dumber en Grischun quinta San Murezzan cun 2’602 (quasi 500 dapli en congual cun l’emprim quartal) a seguan Poschiavo e Puntraschigna.
