Igl è ina cumpetiziun speziala, forsa perfin in tic curiusa. Durant tschintg dis van tschintg persunas en ina boxa, il uschè numnà «Cube» e pondereschan là in’idea u schliaziun per fatschentas grondas d’economia. Quest onn per la UBS, la ABB, Siemens, JTI, Vitol e Roche. Il spezial è che questa boxa ha mo ina surfatscha da 25 meters quadrats, è da vaider e las persunas passentan di e notg en questa. En tut en 30 participantas e participants en boxas a Turitg, Basilea e Genevra.
Schenis che abitan in’emna ensemen
Ils students e las studentas che daventan per exempel inschignieras, economs, giuristas u scienziads da medischina derivan da tut il mund. Per exempel da la China, Ucraina, Algeria, India, Italia, Germania ed era da la Svizra. Da mangiar, medicaments u auters giavischs survegnan els da las persunas che fan part dal comité d’organisaziun.
Sin tualetta e far la duscha pon ellas ir tar ina fatschenta da partenari. Ina da las persunas che procura che tut las persunas en la boxa stattan bain è Selina Kohler. Ella studegia tecnica medicinala a la ETH. Sper quai datti en tut ils sis cubes era in mediatur u ina mediatura che guarda ch’els sa tegnian vid l'urari ed intermediescha en cas da conflicts en la gruppa.
-
Bild 1 von 3. Selina Koher fa part dal comité d'organisaziun ed è durant l'emna da la challenge la bun'olma che guarda ch'i giaja bain cun tuts. Bildquelle: RTR.
-
Bild 2 von 3. Zeynep Savaseri è ina da las 30 persunas che prenda part a la InCube Challenge. Ella ha gust da far part, sulettamain sia collega che sgrufla fa quitads ad ella. Bildquelle: RTR.
-
Bild 3 von 3. Benjamin Horner è mediatur e guarda che l'atmosfera en la gruppa resta buna per tut ils tschintg dis ch'els passentan en il cube. Bildquelle: RTR.
Jau na pens betg ch'i vegn gist ad in cumbat. Dentant poi dar conflicts perquai ch’ina schliaziun vegn preferida u apunta betg.
Quai possia bain esser pussaivel, surtut sch'i va per chattar la schliaziun concreta e betg tuts èn da la medema opiniun. Ina participanta ha anc in’autra tema: in da sia gruppa para da sgruflar. Pervi da quai prenda ella cun ella stapunets d’ureglia. En tut èn s'annunziadas passa 700 persunas per questa challenge, la fin èn vegnidas tschernidas 30 che vegnan partidas si en sis gruppas.
-
Bild 1 von 2. Durant l'emna da preparaziun a Tavau han las persunas visità divers referats per sa preparar sin la challenge. Bildquelle: RTR.
-
Bild 2 von 2. Tschintg persunas cun differentas opiniuns ston vegnir tar ina schliaziun communabla. Bildquelle: RTR.
La challenge
En collavuraziun cun ils partenaris da l’industria han students e studentas d’elavurar ina schliaziun. Els survegnan da las firmas da partenaris ina incumbensa, per exempel da chattar ina schliaziun sco che la fatschenta po spargnar energia. Quest onn èn vegnidas elavuradas incumbensas ensemen cun la UBS, la ABB, Siemens, JTI, Vitol e Roche. La gruppa ch'ha la meglra schliaziun survegn in premi da 2’500 francs ed era l’onur. Bain probabel che la fatschenta dovra la proposta vairamain en ses process.