L’iniziativa da la PPS vul stritgar la rentas da la regenza. Actualmain èsi uschia, che commembers e commembras da la regenza Grischuna survegnan suenter lur uffizi ina renta per vita duranta.
Suenter che tut las vischnancas èn dumbradas, vegn l'iniziativa acceptada cleramain cun 65,36% da las vuschs. Be en duas vischnancas è l'iniziativa vegnida refusada. A la votaziun èn sa participads bunamain 42% da las votantas e dals votants grischuns. La nova regla va en vigur l'entschatta 2027.
Paracrudada d’aur
Grischun: Finì cun il paracrudada dad aur per commembras e commembers da la Regenza – Na a la pensiun per vita duranta
-
GEA
37'995 Vuschs
-
NA
20'137 Vuschs
En sia communicaziun pertutgant il resultat scriva la Partida populara svizra dal Grischun ch'il pievel grischun haja mess in ferm segn. Il resultat saja in success per la politica da la PPS ed ina schleppa per la politica da la regenza e dal Cussegl grond che veglia mantegnair lur pussanza. Il resultat mussia che Grischunas e Grischuns na veglian nagins privilegis pli per magistrats politics.
Reto Rauch ch'è deputà da la PPS en il Cussegl grond è cuntent ed er in zic surprendì da quest resultat cler.
Auter che la Partida populara svizra ch'ha lantschà l'iniziativa han tuttas partidas grischunas pledà per in Na.
Il comité per in Na a l'iniziativa deplorescha en sia communicaziun il resultat ed uschia la schanza manchentada. L'iniziativa creeschia malsegirezzas giuridicas e rendia uschia main attractiv l'uffizi guvernativ. Uschia stoppia la politica uss examinar ina schluccada da la limitaziun da temp d'uffizi che saja la pli severa en tut la svizra. Quai per pudair porscher vinavant cundiziuns attractivas per ina regenza ferma independenta.
Tar questa iniziativa hai dà ina cuntraproposta dal Cussegl grond che avess prevesì in temp transitoric. Gian Michael dal Center avess sustegnì questa – uss sa fa il comité encunter gia patratgs co tegnair attractiv il post en la regenza.
Il Cussegl grond era cunter quest’iniziativa ed ha fatg ina cuntraproposta. Er els èn per abolir la renta per vita duranta. Tenor la cuntraproposta duevi dentant dar ina prestaziun transitorica. La cuntraproposta ha il suveran grischun refusà cun 54% Na. Uschia vala il text da l'iniziativa.
Cuntraproposta dal Cussegl grond
Grischun: Cuntraproposta dal Cussegl grond a l'iniziativa cunter il paracrudada dad aur
-
GEA
26'659 Vuschs
-
NA
29'836 Vuschs
Tar la dumonda da tagl s'expriman bunamain 60% per l'iniziativa. Quella dumonda ha dentant nagin effect damai che l'iniziativa è acceptada e la cuntraproposta refusada.
Dumonda da tagl
Grischun: Duai l’iniziativa dal pievel u la cuntraproposta entrar en vigur?
-
GEA
28'911 Vuschs
-
NA
19'614 Vuschs
Intginas cifras tar la renta
Tar il dretg actual cun la renta a vita duranta paja il chantun tenor las explicaziuns en il cudesch da votaziun en media 28,7 onns ina renta per anteriurs commembers e commembras da la regenza. Sche l’iniziativa vegniss acceptada fissan quai nulla onns. E tar la cuntraproposta che pretenda ina prestaziun transitorica da maximalmain trais onns u enfin la vegliadetgna da pensiun, fissan quai tenor ina stimaziun 2,2 onns ch’il chantun paja ina renta. La paja da cussegliers e cusseglieras guvernativas durant l’uffizi è enturn 270’000 francs l’onn.