Gia a l'entschatta da la sessiun è il ChatGPT - il chatbot cun intelligenza artifiziala - vegnì menziunà per l'emprima giada: Tarzisius Cavizel, il president dal Cussegl grond ha fatg diever dad el en ses pled d'avertura. Ses text na saja betg vegnì scrit dal bot, mabain dad el sez, sulettamain per singulas passaschas a la fin haja el fatg diever da quel. Cun questa avertura ha Caviezel gia fatg attent sin l'ura da dumondas da la mesemna – alura è il ChatGPT e l'intelligenza artifiziala vegnì tematisà gist trais giadas.
Sfida e schanza per las scolas
Il bot aritifizial è cunzunt vegnì tematisà en connex cun las scolas e la tema che scolaras e scolars na scrivan en il futur betg pli sez lur referats e concepts, mabain laschan scriver quels da l'intelligenza artifiziala. Che gliez fatschenta, sa era il socialdemocrat e mainascola da Glion, Silvio Dietrich.
L'entschatta fai schon pensar – nus stuain però er vesair l'intelligenza artifiziala sco schanza
Fin ch'il bot e l'intelligenza artifiziala arrivan propi en la scola, cuzzi probabel anc in temp. Ma l'intelligenza artizifala exista e vegn a sa sviluppar ed uschia vegnan las scolas el futur a stuair sa fatschentar pli intensiv cun uqella tematica, sa era il schef dal departament chantunal d'educaziun Jon Domenic Parolini.
Nus vegnin a stuair sa fatschentar cun las schanzas e cun ils privels
Ina strategia co ir enturn cun l'intelligenza artifiziala e tals chatbots n'han per il mument ni las scolas ni il chantun. Quai fissi anc memia baud – chatGPT è la finfinala per vegnì il november 2022 sin il martgà. Ed ina tala strategia stoppia vegnir coordinada sin plaun naziunal. Far insatge tut sulet na portia nagut, manegia Jon Domenic Parolini. Fin ch'i dat però ina strategia naziunala, vegnì a cuzzar in qual temp – ed uschia vegn era la politica anc a sa fatschentar ina u l'autra giada cun la tematica.
