Siglir tar il cuntegn

Header

cuntegn

Intelligenza artifiziala ChatGPT pudess avair in grond effect sin scolas ed universitads

L'uschenumnà «Chat GPT» pudess avair in grond effect sin la scola e l'universitad. Quai ha ditg la vicedirectura da l’Universitad da Turitg, Gabriele Siegert, en in'intervista cun la «SonntagsZeitung». En quel connex discurra ella d'ina «democratisaziun dal ghostwriting problematica».

ChatGPT è ina intelligenza artifiziala che producescha texts sin dumonda. Ella sa tant resumar studis, sco er scriver istorgias, poesias ed auters texts. Il chatbot po pia er scriver extracts per lavurs da seminari, pensums ed essais. Ina sfida en quel connex è ch'igl n'è betg pli cler tge parts d'in text ch'ina persuna ha scrit ubain in roboter.

Adattar pensums ed examens

Sch'i va tenor Gabriele Siegert stoppian examens perquai vegnir adattads en l'avegnir. Er stoppia la collavuraziun a bucca ed activa vegnir resguardada pli fitg tar las notas da las studentas e dals students. Tenor Beat Schwendimann, da l’Uniun tetgala svizra da la magistraglia LCH saja la dumonda, sch’i fetschia insumma anc senn da dar pensums als scolars, sch’il roboter possia far quels per els.

Il roboter da text è dapi l’entschatta da december gratuitamain online. Gia in’emna suenter ch’il «Chat GPT» è vegnì mess online, ha el nudà passa in milliun utilisaders ed utilisadras.

Adattà al tema

audio
ChatGPT – intelligenza artifiziala sin next level
ord Il Digitip - il tip digital dals 09.01.2023. Maletg: Keystone
laschar ir. Durada: 4 minutas 42 Secundas.

RTR novitads 11:00

Artitgels legids il pli savens

Scrollar a sanestra Scrollar a dretga