La band «Kanti-s -wings» è vegnida fundada l'onn 2005. L'um che maina questa band gia dapi il cumenzament è il gitarrist e musicist Andi Schnoz. Suenter ch'in auter scolast aveva chalà da manar ina band veglia, ha Andi Schnoz surpiglià quella, curt suenter ch'el ha serrà giù ses studi da jazz. Uschia è naschì la nova band cun il num «Kanti-s-wings». Dapi lura haja adina dà novas furmaziuns e novs projects. Intgins scolars han sunà be per in curt temp, auters durant plirs onns.
L'entschatta dovri adina in zic temp per emprender d'enconnuscher in l'auter. In dals dals gronds pensums è adina da chattar in «groove».
Ils «Kanti-s-wings» sa cumponan da scolars e scolaras tanter 13 e 20 onns da la scola chantunala grischuna a Cuira. In sguard enavos mussa, ch'ils Kanti-s-wings han gia sunà chanzun da gronds nums. Ils ultims onns eran quai per exempel chanzuns da Michael Jackson, Queen, Lenny Kravitz, Stevie Wonder u er Pink Floyd. Artists e bands ch'Andi Schnoz taidla gugent e ch'han influenzà il sound da la band da scola.
En il decurs dals onns han ils «Kantis-s-wings» er pudì absolver differents projects sco workshops e concerts durant ils dis da tastas (Tastentage) a Claustra ed èn era sa participadas pliras giadas al barat da bands cun la citad partenaria da Cuira, Bad Homburg.
Per il 20 avel giubileum han ils Kanti-s-wings preparà in concert spezial. Sin il program stat numnadamain l'entir album «Breakfast in America» da la band britannica Supertramp, in classicher da la musica da pop e rock dals onns 70 ed 80. Cun la furmaziun actuala da 12 musicistas e musicists che sunan ina massa differents instruments, sajan ils Kanti-s-wings sa mess en posiziun fitg bain per sunar «Breakfast in America», di Andi Schnoz.
impressiuns da la prova
-
Bild 1 von 9. Bildquelle: RTR.
-
Bild 2 von 9. Bildquelle: RTR.
-
Bild 3 von 9. Bildquelle: RTR.
-
Bild 4 von 9. Bildquelle: RTR.
-
Bild 5 von 9. Bildquelle: RTR.
-
Bild 6 von 9. Bildquelle: RTR.
-
Bild 7 von 9. Bildquelle: RTR.
-
Bild 8 von 9. Bildquelle: RTR.
-
Bild 9 von 9. Bildquelle: RTR.
Er sch'i na saja betg uschè simpel da sunar quest album ed er sch'i capitoa mintgatant in sbagl u sch'i dettia in problem tecnic, il plaschair per il far musica restia. La gruppa saja entant daventada ina gruppa d'amis, ha ditg la chantadura da Kanti-s-wings Zoe Alig.
Nus avain muments che nus trenain fitg serius, dentant il bel é ch'i dat er blers temps ch'èn propi pli leghers.
Suenter circa in mez onn plain provas intensivas stattan ils concerts avant porta. Ils 8 e 9 d'avrigl stattan ils Kanti-s-wings sin tribuna cun las chanzuns da Supertramp ed han preperà anc inqual surpraisa per il giubileum da 20 onns.