Pervi da la chalira èn las temperaturas da l’aua creschidas ferm en Svizra. En plirs lais han ins mesirà tranter 26 e 28 grads, tranter auter en il Lai Bodan, en il Lai da Turitg ed en il Lai da Lugano. A Ponte Tresa han ins mesirà ils ultims dis 28,4 grads. Er ils flums èn pli chauds ch’usità. En l’Aara a Berna han ins mesirà radund 22,4 grads. Tenor SRF Meteo èn questas temperaturas extraordinarias per quest temp da l'onn. Uschia dettia normalmain da quest temp 17 grads en il Lai dals Quatter Chantuns. Actualmain mussa il termometer temperaturas da radund 23 grads.
Temperaturas chaudas, sur pli lung temp, da sur 20 u lura 25 grads pon esser in privel per peschs en ils lais u flums.
Grischun n'è betg anc pertutgà da talas temperaturas
Sco Andreas Meraner da l'Uffizi da pestga dal chantun Grischun ha ditg envers il schurnal regiunal dad SRF na saja la situaziun betg anc critica en il Grischun. Ils lais e flums sajan in zic pli frestgs che quels d'auters chantuns. Munta, dapertut èn las temperaturas intgins grads sut la marca da 20 grads. Pia perfin per peschs ch'han gugent l'aua fraida sco la litgiva d'aual saja la situaziun anc confortabla, di Meraner. Che las temperaturas en lais e flums grischuns èn anc pli bassas ch'en autras regiuns svizras, haja da far cun la geografia. Els èn simplamain situads pli aut e quai saja en quest grà in avantatg.
Pli critica è la situaziun per exempel en il chantun Son Gagl. Là hai actualmain memia pauc aua e las temperaturas èn 4 fin 8 grads sur la media. In quart da tut ils lais e flums cuntanschan la marca critica – sur 25 grads, sco l'Uffizi da pestga dal chantun Son Gagl ha ditg envers SRF. Quai munta – per ils peschs vegni privlus.
Fatg è ch'i duvrass puspè ina giada plievgia intensiva e temperaturas in pauet pli frestgas per calmar la situaziun. Be urizis sco ils ultims dis na tanschan betg.