Siglir tar il cuntegn

Header

audio
Da viadi cun tren cun Leandro Zamuner, ch'è tschorv
Or da Actualitad dals 15.07.2022.
laschar ir. Durada: 3 minutas 47 Secundas.
cuntegn

Leandro Zamuner «Jau poi circa m'imaginar co in tren guarda ora»

En viadi cun tren datti ina massa dad observar e tadlar ed ina pluna pussaivladads per passentar il temp. Leandro Zamuner è tschorv. Il viadi cun tren tutga per el tar il mintgadi.

audio
Las sfidas d'ina persuna tschorva dad ir cun tren
ord Actualitad dals 15.07.2022.
laschar ir. Durada: 2 minutas 7 Secundas.

Leandro Zamuner va savens cun il tren, dad ina vart perquai ch’el riva uschia a sia lavur, da l’autra perquai ch’el fa gugent quai. L'um da 32 onns è tschorv dapi sia naschientscha ed è da viadi cun agid da la channa da tschorvs e da ses telefonin. A l'entschatta da ses viadi arriva el cun il bus a la staziun da Cuira, cumpra in'aua e va per in café. En il tren va Leandro Zamuner en l'emprim vagun en l'emprima classa e giauda il viadi fin a Turitg. Là lavura en en l'administraziun d'ina segirada.

A Turitg hai pli blera glieud, alura poi esser ch'insatgi siglia en il fist.
Autur: Leandro Zamuner



«Il tren è mes segund biro»

Corsin Tuor dirigia differentas furmaziuns da Brass, perquai fa el savens lungs viadis cun il tren. Regularmain er sur cunfin en l'Austria ed en la Germania. Da percurrer las distanzas cun auto na vegn betg en dumonda per el.

audio
Il tren è il segund biro dal dirigent Corsin Tuor
ord Actualitad dals 13.07.2022.
laschar ir. Durada: 2 minutas 22 Secundas.

Per l'ina saja il temp en l'auto temp pers e per l'autra saja era ina dumonda da la conscienza; el giaja pli gugent cun tren e contribueschia uschia sia part per l'ambient. Plinavant haja el ruaus en il tren e possia lavurar. Corsin Tuor lavura adina en il tren, el ha sias partituras ed il laptop cun el e di ch'il tren saja ses «segund biro». En sasez giaja el il pli gugent sulet cun tren. El tradescha ch'el emprovia magari da scappar sch'el entaupia ina persuna enconuschenta, el veglia lavurar durant il viadi.

Il pli cuntent saja el sch'el haja in cumpartiment da quatter cun ina maisa mo per el sulet. Lura possia el s’extender cun sia rauba sco el veglia. I dettia grondas differenzas tranter il traffic public en Svizra, Austria e Germania. En Germania saja quel ina catastrofa totala, el quinta adina d'arrivar cun in'ura retard a sia destinaziun. En Svizra saja il livel da punctualitad e fidaivladad fitg aut.

Dirigent en acziun
Legenda: Corsin Tuor dirigia la Brass Band Berner Oberland durant il concert al festival da la chanzun rumantscha 2019 a Trun. RTR, Dominic Pohle

RTR actualitad 08:00

Artitgels legids il pli savens

Scrollar a sanestra Scrollar a dretga