La fin da matg è l’ultim di da lavur per Roland Leuenberger sco CEO da la Repower. El ha manà 149 sesidas da direcziun en questa funcziun. La mendra saja l’ultima, lura stoppia el dar adia a buns amis e bunas amias.
Dapi il 2016 tar Repower cun crisas e gronds projects
Il 2015 era la Repower en la crisa, Leuenberger è stà responsabel per in fond, che represchentava cassas da pensiun svizras. Sco econom da manaschi ha Leuenberger mussà a la fatschenta grischuna, nua ch’ella ha sias flaivlezzas, e tge che fiss la soluziun. Uschia è vegnì procurà per dapli agen chapital, Roland Leuenberger è sa tschentà en il cussegl administrativ da la Repower, e lezza ha scrit cifras nairas a partir dal 2017.
Sfidas durant la pandemia
La pandemia da corona, l’onn 2020, è stada ina gronda sfida per l’interpresa per il provediment d’energia, ed ha procurà per notgs senza sien.
Tut ils signals d’alarm eran sin cotschen. Ils ristgs dal martgà, ils ristgs da cuntrapartida e ristgs da liquiditad. Manischar tut ils ristgs è stà ina gronda sfida.
E lura la proxima crisa, cun la guerra da la Russia cunter l’Ucraina il 2022. Naginas furniziuns da gas russ, il preci d’electricitad è explodì. I ha dà grondas intschertezzas, sche l’energia per l’enviern 2022/23 saja avant maun.
Gronds projects e renovaziuns
In dals gronds projects ch’è vegni realisà durant il temp da Leuenberger è la renovaziun totala da l’ovra idraulica Robbia en il Puschlav. Il 2024 è quella ida a fin, ella ha custà 115 milliuns francs.
In segn da dumonda resta tar il project Chlus, quai fiss ina ovra idraulica tranter Küblis ed il Rain. Quest project è dapi decennis en planisaziun, ina dumonda da bajegiar n’ha la Repower dentant betg anc inoltrà. Tut las dumondas na sajan betg anc scleridas, uffizis chantunals e federals stoppian anc ir sur ils cudeschs.