Il resultat operativ da la Repower è sa reducì sin 133 milliuns francs, il gudogn munta a 101 milliuns francs, scriva l'interpresa d'energia. La pli gronda cumpart derivia dal commerzi internaziunal cun energia.
L'onn da gestiun passà ha la Repower investì totalmain 142 milliuns francs, quai en modernisar e mantegnair energias regenerablas. Uschia è per exempel vegnida sanada totalmain l'ovra electrica Silvaplauna, sco er renovadas las ovras electricas da Campocologno e Claustra. Actualmain sajan ins anc vid modernisar la tschiffada d'aua Miralago che vegnia dabun als peschs en il flum Poschiavino ed il Lai da Poschiavo. Il settember ha l'ovra Madrisa Solar en il Partenz cumenzà a furnir forza electrica en la rait.
Producziun annuala è sa reducida
Cun 2'147 uras gigawatt ha la Repower producì damain energia. La raschun saja pli pauca aua da naiv che lieua ed er damain plievgia ch'en media cumpareglià cun ils onns avant. Quai haja gì in effect considerabel sin la producziun d'energia idraulica. La gronda part da la producziun da la Repower deriva anc adina da l'energia idraulica cun 56%. Medemamain in pitschen regress ha l'interpresa nudà en la producziun da vent. Ils parcs da vent en l'Italia e la Germania hajan producì pli pauc, quai pervia da las cundiziuns da l'aura.
Persuenter saja creschida la producziun or d'implants da fotovoltaica ed era or d'energia nucleara retira la Repower dapli. Questa maschaida d'energia prestia uschia ina contribuziun impurtanta ad in provediment d'energia segir en Svizra.
