L’Axpo sa focusescha cunzunt sin ils mais d’enviern. Lura dovra la Svizra bler'energia. Il medem moment produceschan ils indrizs solars ed ovras idraulicas pli pauc'energia – per exempel perquai ch'il sulai straglischa lura pli pauc ferm. Per schliar quai datti da principi dus scenaris per l'Axpo:
- Dapli ovras atomaras
- Dapli energia regenerabla
Tut ils dus scenaris prevesan dentant che las ovras atomaras existentas restan vid la rait uschè ditg sco pussibel. Uschia avessan ins temp da construir dapli infrastructura.
Ovras atomaras: custs auts e gronda malsegirezza
Ina nova ovra nucleara fiss fitg chara da construir. Il risico finanzial saja memia gronda per in'interpresa - il stadi stuess surpigliar il risico. Quai è il facit dal studi. Plinavant datti grondas dumondas avertas sche la populaziun e la politica faschessan cun, di il schef da l'Axpo, Christoph Brand, en in'intervista cun SRF.
Nus temain in scenari, nua che nus discutain diesch onns davart novas ovras nuclearas, construin nagut en il fratemp ed a la fin cun mauns vids.
Perquai favorisescha l'Axpo la via sur dapli energia regenerabla – surtut energia da vent. Il scenari cumbinescha dapli energia da sulegl, aua e vent cun il manaschi a lunga vista da las duas ovras atomaras da Gösgen e da Leibstadt. En quest scenari propona l’Axpo plinavant da construir novas ovras d'electricitad da gas sco reserva che pudessan furnir ulteriuras electricitad, per exempel l’enviern.
Dapli energia da vent – gas u atom sco alternativa
Durant l'enviern producescha il sectur d'energia da vent vinavant blera energia. Perquai prevesa il scenari da construir dapli rodas da vent en Svizra. Encunter parcs da vent datti dentant adina svelt protestas. Tenor il schef da l'Axpo tschessa il protest dentant spert cura che la glieud vesa ils effects. Er las istorgias da numerus utschels morts e canera na correspundian betg als fatgs. Sch'ins n'installescha betg dapli rodas da vent dovri autras funtaunas d'energia – numnadamain energia atomara ubain gas. Ovras da gas fissan surtut qua per surmuntar sch'i dat stretgas.
I fetschia dentant vinavant segn da promover indrizs solars. Surtut la stad hajan quels in grond potenzial. Construir quellas ovras sin ils tetgs da las chasas saja ina strategia efficienta.
Brand: «Sa decider per ina via»
En Svizra vegn gia daditg discutà davart l'energia e con garantir ella. Mintga partida politica ha là ses program. La Svizra sa stoppia dentant uss far in’opiniun e sa decider per ina via, manegia il schef da l'Axpo Christoph Brand. I saja il fauss lieu per soluziuns simplas placativas. «La resursa la pli stgarsa da la politica d’energia svizra n’èn betg ils daners u la tecnologia, mabain la prontezza da far cumpromiss», di el envers SRF. La Svizra na vegnia betg giu dal flatg, sche tuts sa demoleschan be pervia las dumondas pitschnas.
Adattà al tema
Part da las energias regenerablas fan er implants solars. Cun il Solarexpress ha cumenzà avant intgins onns in pau in boom d'implants solars gronds. Ils «Cuntrasts» èn sa dumandads: Fan implants solars gronds insumma senn en las Alps? Tgi gudogna, tgi perda? E tge fissan alternativas?