Tradì il num ni ils nums tgi che vegn ad esser la nova u il nov secretari general da la Lia Rumantscha, n'ha Patric Vincenz betg. Ensemen cun Urezza Famos e Donat Nay è el stà part da la gruppa d'evaluaziun ed ha er manà ils discurs da preschentaziun e fatg la proposta a l'entira suprastanza che decida. «Nus essan en la fasa finala», tradescha Vincenz. En dus enfin trais emnas vegn la Lia Rumantscha a communitgar. Ins saja en ils discurs finals per concretisar la successiun, quai sajan discurs da detagls.
Secretari general ad interim
En vista al fatg ch’il post da la secretaria generala respectivamain dal secretari general è stà vacant plirs mais, ha la suprastanza numnà l'atun passà Andreas Gabriel sco secretari general ad interim. El è il substitut dal secretari general ed actualmain responsabel per la represchentanza dals interess ed ils affars publics. Ensemen cun la direcziun vegn el a segirar la gestiun operativa.
Andreas Gabriel – che ha surpiglià questa funcziun gia per la quarta giada – ha accentuà sin dumonda da RTR da betg esser in candidat.
