L’entir triep da lufs dal Beverin duai vegnir allontanà sin basa da la clausula generala da la polizia. Quai pretenda in’incumbensa, inoltrada da Gian Michael, da l'Allianza dal Center, ch’è vegnida surdada per mauns da la regenza. En pli duain er tut ils auters lufs ch’han in cumportament problematic e ch’impedeschan ina coexistenza vegnir sajettads.
Nus na clamain betg si ad insatge illegal. Nus avain questa clasula generala da polizia e sch'ils puncts ch'i dovra vegnan ademplids lura sto la regenza intervegnir. La regenza avess gia ils davos onns inqual giada pudì intervegnir pli baud.
La regenza ha adumbatten fatg attent il Cussegl grond ch’ella n’ha betg la basa legala per far quest pass – cunquai che la regulaziun da lufs vegn reglada via lescha federala. En pli dastgia la clausula generala da polizia sulettamain vegnir duvrada en situaziuns extraordinarias e sco ultima ratio – suenter che tut tschellas opziuns sajan vegnidas evaluadas. Er il chantun Grischun stoppia sa tegnair, malgrà tutta problematica dal luf, vi da la lescha.
Votums n'han betg purtà fritg
Ils votums da la regenza e la sanestra n'han a la fin betg purtà fritg. Ils burgais en sa mess atras cun lur incumbensa – malgrà tuttas admoniziuns areguard la legalitad. Per exempel ha la deputada Anita Mazzetta (Verda) fatg attent il Cussegl grond, ch'ins saja anc adina en il Grischun, nua ch'ins stoppia sa tegnair vi da la lescha.
Nus na essan betg en il wildwest.
Er l'incumbensader Gian Michael na vul betg ch'i dettia wildwest en il Grischun. En cas da dubi stoppia la regenza però sa decider per la populaziun muntagnarda e cunter il luf. Suenter lunga discussiun en il Cussegl grond è l'incumbensa alura tuttina vegnida surdada cun 73 cunter 39 vuschs tar 3 abstenziuns.
Emprima incumbensa per Carmelia Maissen
L'incumbensa ch'è vegnida surdada è l'emprima per la nova cussegliera guvernativa Carmelia Maissen. In'incumbensa che stat giuridacamain sin chommas falombras.
En il Cussegl grond è vegnì menziunà en plirs votums ch'i na saja betg il giavisch che la regenza surpassia reglas u cumpetenzas. E la regenza ha er confermà quai, ella vegn ad applitgar l'instrument cura che las premissas en dadas.
La regenza vegnia uss en scadin cas a tegnair en egl la situaziun e quai betg mo tar il triep dal Beverin, uschia Carmelia Maissen. I saja lura da giuditgar da cas tar cas la situaziun e là nua che las premissas en dadas tenor la clausula generala da polizia vegnia quella lura er applitgada.
Or da l'archiv:
