Mafiosis en Grischun - Roveredo pretenda meglras controllas e communicaziun dal chantun
Tar in'acziun internaziunala cunter la mafia da drogas èn set persunas vegnidas arrestadas. Quatter da las persunas han abità en Grischun – legalmain cun ina permissiun da dimora B. La vischnanca da Roveredo pretenda meglra collavuraziun e controlla.
L'emna passada era vegnì enconuschent ch'ils investigaders dad Europol han fatg ina razzia simultana en Frantscha, l'Italia ed en Svizra – ed arrestà set persunas, quatter da quellas en Frantscha e trais en l'Italia. Las inquisiziuns èn vegnidas coordinadas dad Europol: involvà è er stà l'Uffizi federal da polizia (Fedpol).
Entant rapporta Radiotelevisione della Svizzera Italiana RSI che 4 da questas persunas avevan lur domicil a Roveredo en il Mesauc. Tuttas cun ina lubientscha da dimora B. Quai entant che quels vegnivan tractads dad Europol sco finamira gronda e vegnivan tschertgads.
Brev da Roveredo a Cuira
Avrir la boxSerrar la box
La vischnanca da Roveredo ha tramess ina brev a Cuira. En quella pretenda ella dapli attenziun en connex cun conceder permissiuns da dimora – en spezial, sch'i sa tracta da persunas ch'èn gia prechastiadas.
«A noss avis manca cunzunt la conscienza che persunas cun in tal register penal possian obtegnair uschè facilmain ina permissiun B sin terren svizzer», sa lamenta Decio Cavallini, vicepresident communal da Roveredo, envers il radio e la televisiun da la Svizra taliana (RSI). «En pli damai ch'in auter chantun l'aveva refusà, ed in terz chantun era gia curt avant concluder l'expulsiun or da la Svizra. Nus ans dumandain damai: Co è quai pussaivel en il Grischun?»
La dumonda sa drizza a l'Uffizi da migraziun dal chantun Grischun. Tenor las enconuschientschas ch'èn avant maun duai in dals quatter arrestads avair survegnì ina permissiun B malgrà ch'el aveva chastis precedents. Avant aveva il chantun Tessin refusà quai.
Las autoritads communalas da Roveredo èn da l' avis che quai na saja betg acceptabel. En la brev che cumpiglia set paginas pretendan els in'integraziun pli intensiva da las vischnancas ed in barat d'infurmaziuns pli intensiv tranter ils chantuns.
Mo uschia pudessan vegnir evitads cas sumegliants en il futur.
I sa tracta dad in um da 52 onns e ses figl da 24 onns. Era a Roveredo ha abità la partenaria da 37 onns da l'um da 52 onns. Ella è la figlia dad in um da Montenegro ch'è medemamain vegnì arrestà tar questa acziun. El saja stà ina finamira gronda ed è vegnì tschertgà en l'entira Europa. Plinavant è vegnì arrestà in Talian da 44 onns ch'ha abità a Roveredo en ina chasa dasperas.
Nagina controlla automatica dal register penal
Avrir la boxSerrar la box
Tuts quatter arrestads da Roveredo hajan gì in permiss da domicil B che vegn dà ora da l'uffizi da migraziun a Cuira. Vischins da l'UE survegnan quest permiss en Grischun senza ch'il chantun controllescha avant il register penal da la persuna. Quai cuntrafaschess numnadamain a la cunvegna davart la libra circulaziun da persunas cun l'Uniun europeica.
Auter vesa il chantun Tessin quai. Lez controlla dapi il 2015 automaticamain il register penal tar dumondas per il permiss B che vegnan da l'Italia – e cuntrafa cunquai sapientiv a la cunvegna cun l'UE. Il chantun argumentescha ch'i giaja per la protecziun da la populaziun e quella saja definida en la Constituziun chantunala ed a quella na possian ins betg cuntrafar.
Il chantun Grischun vesa auter quai – sin dumonda da RTR di l'uffizi da migraziun a Cuira ch'i na dettia nagin connex causal tranter il register penal e da la finala far en il Grischun in crim. Era persunas senza preistorgia criminala possian commetter in crim en il Grischun.
Il Cussegl federal è actualmain vi da sclerir cun l'UE sche quella accepta en il futur la controlla dal register penal tar dumondas da dimora.
L'acziun gieva encunter ina rait da commerzi cun cocain internaziunala che vegn manada da la Camorra napolitana e la 'Ndrangheta calabresa.
Las investigaziuns han cumenzà gia avant dus onns, suenter che las autoritads svizras avevan survegnì in avis sin in burgais talian. Sco quai ch’igl è sa mussà, ha quel lavà daners a l'engronda per la mafia.
En connex cun las investigaziuns han las autoritads internaziunalas, tranter quellas era la Procura publica federala svizra, scuvrì in sistem da cuntrabanda cun cocain. Las drogas vegnivan cun ina bartga or da l'America dal Sid e vegnivan alura transportadas en autos da luxus.
Legenda:
Il cocain è vegnì transportà en autos da luxus.
Europol
Las entradas èn vegnidas lavadas cun agid da firmas, quints sfalsifitgads ed investiziuns en immobiglias. L'Uffizi federal da polizia Fedpol ha fatg pliras perquisiziuns da chasas en il Grischun ed en il Tessin ensemen cun las polizias chantunalas. Sin il territori svizzer n’è dentant vegnì arrestà nagin.
