La sonda ha la Ems-Chemie envidà a la 62avla radunanza generala. 2'215 persunas han chattà la via a Domat. Sper las cifras da l'interpresa èn cunzunt er ils dazis americans da 39% stads tema. Uschia èn bleras acturas ed acturs da l'economia svizra e grischuna stads preschents. La radunanza generala da la Ems-Chemie ha uschia er fungà sco plattafurma d'economia en vista a la situaziun actuala.
Era la scheffa da la Ems-Chemie Magdalena Martullo-Blocher n'è betg stada incantada dals dazis americans. La Ems-Chemie sezza na pertutgian quests dazis dentant strusch, ha Martullo agiuntà. Ins haja gia baud cumenzà a producir directamain en ils Stadis Unids. E là nua ch'i pertutga l'interpresa sajan ins vid sclerir autras schliaziuns.
Ils dazis na pertutgan nus strusch.
Ses clients percunter sajan per part pli fitg pertutgads. Tenor Martullo saja la situaziun il mender dentant cunzunt en ils Stadis Unids cunquai che la glieud cumpria uschia pli pauc perquai ch'els han il sentiment che tut vegnia pli char.
Nus stuain tractar vinavant cun ils Stadis Unids.
Cler è per ella ch'i dovra vinavant tractativas per il bain da las firmas svizras che vulan exportar però era per il bain dals consuments americans che vulan cumprar.
Impressiuns da la radunanza generala
-
Bild 1 von 3. Bildquelle: RTR.
-
Bild 2 von 3. Bildquelle: RTR.
-
Bild 3 von 3. Bildquelle: RTR.
Cun las cifras da l'onn passà, sco er l'emprima mesadad da l'onn è Martullo cuntenta. Ella spetga plinavant cun meglieras cifras per l'onn current che l'onn passà. Sper las cifras è vegnì decidì ina dividenda da 17,25 francs. L'onn passà eran quai anc 16 francs per aczia.
Ems-Chemie cun pli pauc svieuta ma dapli gudogn
Il concern da chemia Ems ha fatg en l'emprim semester dal 2025 pli pauca svieuta, dentant gudagnà dapli. Sco quai che l'interpresa scriva, saja la svieuta sa reducida per 6,2% sin 1,02 milliardas francs. Raschuns per la digren sajan ils effects da valuta sco er la situaziun politica, commerziala e geopolitica che frainia la prontezza da cumprar ed investir da consumentas e consuments. Gia il fanadur a la conferenza da medias ha Magdalena Martullo-Blocher ditg ch'il president dals Stadis Unids fetschia il mument mal il venter.
A mai fa quai mal il venter sch'il president Trump annunzia mintga di insatge nov.
Persuenter è creschì en l'emprim semester da l'onn il gudogn, quai per 1,4% sin 296 milliuns francs (EBIT). Motiv sajan fatschentas novas e dapli effizienza. Gist era pervia la situaziun tendida saja la Ems sa decidida d’investir en sias fatschentas da commerzi en las regiuns Asia, America ed Europa. Questa situaziun porschia era bleras novas schanzas.
Nus stuain era profitar da quels temps. Nus avain uschè bleras schanzas sin novas fatschentas. E quellas piglian nus ussa.
Concern conferma prognosa
Per l'onn 2025 quinta l'Ems-Chemie vinavant cun in resultat levet pli bass ch'anc il 2024 ed in resultat operativ (EBIT) che crescha levet. La raschun sajan cunzunt effects da valuta. La fatschenta veglia sa concentrar en la situaziun intscherta dal martgà anc pli fitg sin spazialitads innovativas.