En cas ch'i reussescha uschia da controllar meglier il traffic, saja quai in exempel era per autras vischnancas. Mesiras a lunga vista èn per la maisa radunda tranter auter d'informar anc pli ftg la glieud sin via, reglar la sveltezza u dosar las entradas ed extradas sin l'autostrada.
Il traffic sin l'A13 n'è betg mo in problem durant Pasca u Nadal, cunzunt las fin d'emnas ston ins quintar cun bler traffic. Blers automobilists ed automobilistas svieschan lura gugent sin las vias tras ils vitgs en las vischnancas vischinantas. Pervi da quai pretendan era las vischnancas vischinantas soluziuns.
Vischnancas dovran agid
Zizers è ina vischnanca pertutgada directamain dal traffic tras il vitg, chaschunà da las colonnas sin l'autostrada. Il president communal Peter Lang è pertschart che las vischnancas na vegnan betg da schliar persulas il problem dal traffic.
Jau na sperescha betg che nus vegnin trumpads da la sentupada. Igl è impurtant che nus vegnin udids e che nus chattain ina soluziun.
Sco soluziun realistica vesa la Polizia chantunala da reducir la limita da tempo. Els hajan gia fatg bunas experientschas cun quai, di il pledader da medias Cuno Berther. Il problem dal traffic massiv tras las vias n'è betg mo che las persunas na vegnan betg da traversar la via, mabain anc in auter. En cas d'in accident na vegn in'ambulanza era betg al lieu. La lingia da segirtad vegnia dentant pratitgada relativamain bain.
