In trenader da skis talian ch'ha lavurà onns a la lunga per l’Uniun grischuna da skis è vegnì sentenzià e bloccà per tschintg onns. La Dretgira da sport svizra ha declerà l’um da 52 onns culpant d’avair maltractà junioras da 16 fin 18 onns, tant psichicamain sco era fisicamain – per exempel cun tutgar en las atletas nuncommensuradamain, cun observar ellas sut la duscha, ma era cun far remartgas malnettas e sbragir, smanatschar ed umiliar ellas.
Tenor la documentaziun da la Dretgira da sport svizra aveva il post «Swiss Sport Integrity» (SSI) survegnì il zercladur 2023 pliras annunzias dad atletas. Il post ha lura dumandà pliras atletas e contactà l'uniun da skis. Era questiunà l'inculpà ha Swiss Sport Integrity. Quel ha u dementì las reproschas ubain ditg che quai na saja betg stà uschè nausch sco interpretà da las atletas.
En l'uniun da skis hai dà discurs ed ina persuna da sustegn ha procurà ch'il trenader na saja betg pli persul cun las atletas. Il trenader è en il decurs da l'onn lura s'annunzià malsaun pervi da problems psichics chaschunads da las reproschas. A la procedura è el stà absent nunperstgisadamain.
Sentenzia e consequenzas
La sentenzia da la Dretgira da sport svizra declera il trenader culpant d'avair cuntrafatg als statuts etics dal sport svizzer. Ella decretescha in scumond da trenar atletas ed atlets da tut las categorias da giuventetgna e juniors. En pli sto il trenader far part almain 25 uras da coaching à 45 minutas davart temas da violenza psichica, sexuala ed etica en contact cun minorennas.
Posiziun dal president da l’Uniun grischuna da skis da lez temp
L’anteriur president da l’Uniun grischuna da skis Gaudenz Bavier ch'è stà en uffizi dal 2013 fin il 2025, ha confermà ad RTR il cas ed ha deplorà quel. Bavier ha declerà ch'il trenader saja vegnì engaschà il 2019 pervia da bunas referenzas. Suenter in onn han intginas atletas demissiunà, quai ch'haja chaschunà ina retschertga interna. Quella haja mussà ch'i devia problems. Bavier di ch'i haja dà discurs cun trenaders, atletas e geniturs. Il trenader inculpà ha survegnì sustegn psicologic. I saja er vegnì decidì che trenaders dastgian mo pli trenar cun las atletas sch’els vegnian accumpagnads d’in auter trenader.
