Ils 20 da matg 2025 è per la fundaziun Origen in di da festa. Er sche l'aura è grischa – il sulegl splendura en las fatschas dals responsabels. Il cusseglier federal Guy Parmelin vegn cun il helicopter en Surses per inaugurar il nov simbol dal festival da cultura.
Il di avant ha per causa da l'aura e motivs da segirtad in helicopter purtà davent la cuverta ch'ha zuppentà ils davos mais la tur. Las medias han rapportà da quest mument. Ina inscenaziun cun pump e gloria.
Il magistrat, ils giasts, la pressa e persunas interessadas èn stadas part d'in mument – cura ch'il vitg dals Mulegns ha survegnì per ils proxims tschintg onns ina tur, in magnet turistic.
La nova tur alva remplazza la tur cotschna sin il pass dal Güglia e daventa il nov simbol per il festival d'Origen.
Ella duai scriver vinavant l’istorgia da Mulegns ed interpretar quella da nov, ha Giovanni Netzer, l'intendant d'Origen, ditg a la preschentaziun da la tur. Il project è vegnì realisà en stretga collavuraziun cun la Scola politecnica federala ETH da Turitg.
Ina stad 2025 cun bleras visitas a Mulegns
La tur è in magnet e sveglia marveglias. Passa 2'000 persunas èn vegnidas guidadas ed infurmadas sin la tur. Da quai da 30'000 persunas han la stad visità ils Mulegns ch'ha gnanc 20 abitants. Tgi è vegnì aposta per vesair la tur, tgi è simplamain sa fermà sin la via sur il pass.
Betg tuts cuntents cun las visitas
Nua ch'i ha blera glieud èn er ils problems betg lunsch davent. Abitants ed abitantas da Mulegns recloman pervia dal cumportament da persunas che n'hajan nagin senn per sfera privata e passian simplamain dapertut per mirveglia, per fotografar u per autras chaussas persunalas. In fenomen da societad ed in problem che sveglia ravgia. Na, la tur na plascha betg a tuts e tuttas. La fitg gronda part dentant è intgantada da l'idea, da la realisaziun e da la tur sco tala. En mintga cas è la tur alva er in factur turistic ed economic per la regiun.