In'analisa da las scolas autas da Cuira mussa che mancan pel mument circa 620 chombras. Quai pertutga er las studentas ed ils students che vegnan da l'exteriur. Patrick Degiacomi, il suprastant da la citad da Cuira, numna questa situaziun ina gronda sfida.
Nus savain da scolas autas che intgins interessents na studegian betg qua, perquai ch'els na chattan nagina pussaivladad d'abitar. E quai è natiralmain desastrus.
Sche las studentas ed ils students na chattan naginas chombras, dettia quai ina schleta glisch sin la citad da Cuira.
Ins tschertga vias da soluziun
Dapi il mars lavur ina gruppa da lavur vi da quella problematica. Ed er il parlament da Cuira ha surdà avant in mais l'incumbensa a la suprastanza da chattar ina soluziun e da dar gas.
En in emprim pass vuless la citad examinar tge edifizis e parcellas che vegnissan en dumonda per laschar vids temporarmain.
Ins pudess dir che surfatschas liberadas strategicamain sur 20 o 30 onns vegnian utilisadas per pussibilitar l'abitar da students cun per exempel containers da lain.
Tenor Patrick Degiacomi na saja quai però betg mo chaussa da la citad. Mabain er il chantun u privats pudessan gidar.
In auter scenari fiss che la citad da Cuira construiss sezza abitaziuns sin parcellas che na vegnan betg duvradas.
Ina parcella, ch'è gist sper la chasa da scola Fortuna, l'anteriur parcadi da la plazza da ballape, fuss in'opziun per far insatge.
A curta vista vegniss la citad mo da cuvrir dus terz da las 620 chombras che mancan. A lunga vista dettia er in project d'ina chasa per students. Quella emprova la FHGR da realisar. Dentant duras quai anc 10 onns, di Patrick Degiacomi.
In'idea da Turitg che pudess gidar
Nus duvrain instruments sco quels ch'i dat a Turitg, nua ch'i dat ina rait d'abitaziuns per la giuventetgna. In'uniun privata prenda a fit immobiglias ed utilisescha ellas temporarmain per l'abitar da studi.
Cler è, per che Cuira restia in lieu da furmaziun per ses 3'000 studentas e students, sto i dar dapli abitaziuns en l'avegnir.