Siglir tar il cuntegn

Header

video
Mancanza d'aua en la chamona da Cavardiras
Or da sil punct dals 03.08.2022.
laschar ir. Durada: 2 minutas 36 Secundas.
cuntegn

Mancanza d'aua Il manaschi en la chamona Cavardiras è periclità

L’enviern cun pauca naiv, las chaliras e la mancanza da plievgia han consequenzas per las chamonas: Per part manca l’aua. Per savair quant grond ch’ils problems èn, ha il Club Alpin Svizzer CAS fatg ina retschertga tar ses commembers. 70 dad els han returnà in questiunari en chaussa.

La situaziun d'aua è bain precara – il mument dentant be en paucas chamonas situadas fitg aut. La gronda part da las autras chamonas haja anc avunda aua, di Ulrich Delong ch’è responsabel per las chamonas dal Club alpin Svizzer. La situaziun po però s’agravar las proximas emnas, sch’i na plova betg avunda.

Chamona da Cavardiras al limit

Da las chamonas grischunas ch’han returnà il questiunari è la Chamona Cavardiras, sur Mustér, quella cun ils pli gronds problems. Tenor Tobias Zahn che lavura dapi 14 onns regularmain en questa chamona, mancan ils champs da naiv che prevedan la chamona normalmain fin l’atun cun aua. Uschia è la chamona dal tuttafatg dependenta da plievgia.

Sche nus quintain cun 30 persunas che pernottan tar nus mintga di, sch’avain nus anc aua per 10 dis.
Autur: Tobias Zahn Collavuratur chamona Cavardiras

Tant è però cler: Sch’i na plova betg regularmain las proximas emnas, ston ins quintar che la stagiun va a fin pli baud che previs en la chamona da Cavardiras.

Plans per renovaziun

La guardia chamona Manuela Fischer che maina gia la 34avla stagiun questa chamona communablamain cun ses um, ha ditg dacurt ad RTR: La situaziun è sa dramatisada ils ultims onns e las lingias d’aua ston perquai vegnir tgiradas mintgadi, cun laschar ora l’aria e sperar ch’almain daguts vegnian els tancs. Per meglierar la situaziun en la Chamona da Cavardiras duai dar ina sanaziun e renovaziun da l’entira chamona ils proxims onns, cun integrar in tanc grond da 15’000 liters en la chamona.

audio
Ad intginas chamonas dal CAS manca per part l'aua
ord Actualitad dals 14.07.2022.
laschar ir. Durada: 4 minutas 39 Secundas.

RTR novitads 10:00

Artitgels legids il pli savens

Scrollar a sanestra Scrollar a dretga