Marianne Beer da Mustér è ina da quellas ch'è s'annunziada suenter l'appel dal chantun per sa gidar cun il sectur da sanadad. Ella ha fatg la scola da tgirunza a Glion, ha lavurà en l'ospital a Glion, a Tusaun ed a Cuira ed ha era lavurà tar la Spitex Cadi.
Avant 16 onns ha Marianne Beer bandunà la lavur en il sectur da sanadad ed è sa focusada sin la famiglia. Uss fiss ella puspè pronta da s'engaschar a chaschun da l'appel dal chantun. Surpigliar lavurs da basa fiss per ella nagin problem. Starment haja ella dentant da tut quai ch'è vegnì digitalisà anc pli fitg ils ultims 16 onns.
Ella è persvada ch'i dessa lavurs nua ch'ella n'è betg pli uschè rutinada e duvrassa pli ditg u duvrassa sustegn. Ma la finala saja persunal ch'haja almain experientscha en la tgira meglier che da quellas e da quels che na san betg sco s'occupar da pazientas e pazients cun basegns spezials. Marianne Beer manegia che mintga agid pudess esser impurtants en cas ch'il sectur da sanadad daventa anc pli fitg sut squitsch.
