Martgà da plugls - «A mai plascha ch'ils uffants pon ina giada far ils pretschs»

Animals da plisch, puzzles, legos u vestgadira. Sonda passada ad in bel di da primavaira è la via da la staziun a Cuira daventada in lieu da scuntradas per pitschens martgadants e pitschnas martgadantas. Uffants tranter 5 e 15 onns han pudì vender chaussas ch'els na dovran betg pli al martgà da plugls, ed era ir a cumprar novas chaussas dad auters uffants.

Ins bada svelt tar il martgà: Creschids n'han betg bler da dir. Ils uffants fixeschan sezs ils pretschs, organiseschan lur stans e sesan tut il di là, pronts per martgadar cun auters uffants u era creschids che vulan cumprar insatge. E quai fan els cun ina persvasiun. Ins bada ch'i na va betg mo per far raps, mabain era per il contact cun auters uffants ed in esser ensemen.

Da totalmain 60 stans eran tar 56 stans uffants a vender chaussas. Mintgatant 3 soras, dus amis u in bab u ina mamma ch'ha anc sustegnì in uffant pitschen. Caroline Manetsch è la responsabla per la sparta dad uffants e famiglias da la citad da Cuira ed ella è part da l'organisaziun dal martgà da plugls. Ella di ch'els sajan cuntents cun las cifras. Ils onns passads ha gì lieu il martgà adina il settember. E perquai che l'interess era uschè grond, han ins uss vulì spartir quai e far era in martgà da primavaira.