Martgà da plugls - Ils stgazis da la claustra da Glion vegnan vendids

Gia avant che las portas han avert las diesch la damaun, han spetgà ina massa persunas en l'entrada da la claustra da Glion per pudair entrar sco emprim e svutrar atras la rauba che vegn vendida da la claustra. Quai n'èn numnadamain betg mo rusaris, cruschs e maletgs religius – mabain era vaschella, plattas da grammofon enfin a pullovers da launa, cliniez ed instruments da musica.

L'interess è stà grond e la glieud vegn da tut las varts. Ina dunna è schizunt viagiada da Sta. Maria en la Val Müstair e pernottà a Glion per pudair esser ina da las emprimas.

La rauba per vender è vegnida repartida en differentas chombras, la pli blera rauba en la gronda aula, alura anc purtrets e mobiglias en l'entrada ed en ina chombra èn stads tut ils instruments da musica. En il tschalers dettia dentant anc bler dapli da vender, sco che Jolanda Hassler che lavura per la claustra raquinta. Uschia duessi dar anc autras fieras da plugls en ils proxims onns, e forsa, sche tut funcziuna, vulan ellas schizunt avrir ina brocki.

impressiuns da la fiera da plugls

Las soras dominicanas fan midada

Perquai ch'i dat adina pli paucas soras sto la claustra vegnir vendida, e las soras vulan far midada en il stabiliment nua che entant è anc la scola. Quella duess vegnir renovada, ed alura daventa quai il nov dachasa per las Dominicanas. Entant vivan anc 56 Dominicanas en la claustra da Glion, e la mesadad dad ellas sto vegnir tgirada.

I saja bel da pudair anc esser da la partida cura che tut las chaussas vegnan vendidas e da vesair, tge plaschair che las persunas han. Sora Ermelinda di, ch’i saja ina onur da vesair, quant grond che l'interess saja vi da las chaussas che ellas vendan da lur claustra. Uschia na saja betg uschè grev da prender cumià.