Ils ultims onns vegnia adina pli grev d'occupar posts en la politica communala. In sumegliant svilup sa mussa tenor il chantun er cun occupar posts en l'adminstraziun. Però senza avair avunda glieud ch'è pronta da surpigliar er talas lavurs, saja il sistem federalistic da buna qualitad en privel, uschia scriva la regenza en lur communicaziun.
Per far frunt a quest problem ha la regenza surdà a l'Uffizi da vischnancas d'instradar differentas mesiras. Tranter auter fa ella suandantas propostas:
- videos explicativs per persunas che cumenzan en la politica communala
- broschuras e manuals tar differentas tematicas sco p. ex. la radunanza communala
- med d'instrucziun per gimnasis e furmaziun professiunala
- sviluppar ideas co preschentar la vischnanca e l'organisaziun politica en la scola populara
- furmaziun pratica per persunas en uffizis communalas ubain che cumenzan cun in tal
- plattafurma digitala per il barat da savida tranter collavuraturs da las vischnancas e dal chantun
Questa plattafurma digitala duai grazia ad intelligenza artifiziala rimnar e parter savida ed er colliar las vischnancas. Schliaziuns pussaivlas per in problem ch'èn gia vegnidas chattadas tar ina vischnanca duain vegnir partidas er cun autras.
I dat cas nua che persunas da las vischnancas èn pli fermas tar singuls temas. Pia questa plattafurma tschertga las persunas cun la pli gronda savida.
L'intent da questa plattafurma è pia propi da rimnar e parter savida ch'è gia avant maun per che tuts possian profitar da quella.
Far reclama per uffizis politics
Finamira da l'entira acziun è da crear dapli attenziun e mussar quant impurtant ch'igl è d'avair structuras communalas che funcziunan per l'entir sistem politic ed administrativ dal stadi.
La finamira è cleramain che nus avain ina populaziun activa che surprenda er responsabladad, ch'ins ha la schelta e ch'ins ha la situaziun che uschè blers sco pussaivel s'engaschan.
Er duai la populaziun savair dapli davart la vischnanca, ses organs e sias funcziuns. E la finala duai l'Uffizi da vischnancas dal Grischun er gidar ad occupar ils uffizis e plazzas en las vischnancas.
Finanzià vegn tut sur il budget ordinari dal chantun. L'entir pachet da mesiras n'è betg limità sin in tschert temp e po er vegnir adattà tenor basegn. Quai en collavuraziun tranter differents departaments, uffizis ed instituziuns.
