Ella prendia sco i vegnia, e guardia cun tensiun e plaschair sin la mesemna proxima, quai di Franziska Preisig che sesa quels dis en il Cussegl grond a Cuira. Sche Jon Pult vegniss elegì, lura ruschnass la deputada da Samedan suenter e politisass a partir da la sessiun da favrer en il Cussegl naziunal a Berna. Preisig aveva suenter Pult fatg las pli bleras vuschs dals socialdemocrats. Da defender il segund sez da la PS n'era betg gartegià. L'october ha Roman Hug da la Partida populara fatg la cursa per il tschintgavel sez grischun.
I fiss in zic in auter sentiment che da vegnir elegida directamain la dumengia d'elecziuns, di Franziska Preisig. Ma era d'ertar il sez da Pult avessi ella plaschair. In'ulteriura schanza per far il pass a Berna.
Schanzas vegnan e van, sch'i na gartegia betg na sun jau betg trumpada. Jau na sun betg ina persuna che planisescha a lunga vista ed è lura trumpada.
In zic auter ch'ina elecziun directa
La giurista, docenta e mamma da famiglia deplorass pli fitg, che la Svizra manchentass ina schanza sch'il parlament a Berna n'elegess betg Jon Pult. L'elecziun dal Cussegl federal cun ils dus candidats socialdemocrats Jon Pult e Beat Jans è ils 13 da december.
Jon Pult – il retoricher ch'è restà en memoria
Il socialdemocrat ha politisà durant otg onns (2010-2018) en il Cussegl grond a Cuira avant ch'el ha cuntinuà sia carriera politica a Berna. Durant quest temp ha el laschà enavos inqual fastiz tar las deputadas ed ils deputads.
RTR ha fatg la runda tar politichers ch'èn stads ensemen cun Jon Pult en il Cussegl grond. Cler che Jon Pult è restà en memoria a bain inqual deputà dal parlament grischun. E sch'i va per ina chaussa èsi cler per tuts: Jon Pult è adina stà in fitg bun e clever retoricher. Uschiglio van las opiniuns dentant magari dapart sch'i discurran dal candidat per il Cussegl federal.
