La Trucca a Glion viva da donaziuns da vestgadira – e da quellas na manchia betg. Lucrezia Berther, suprastanta da l'uniun da dunnas da Glion, maina tranter auter la butia da segund maun.
-
Bild 1 von 3. La Trucca – in project da l'uniun da dunnas da Glion. Bildquelle: RTR.
-
Bild 2 von 3. Bildquelle: RTR.
-
Bild 3 von 3. Bildquelle: RTR.
Trais giadas l'onn rimna l'uniun da dunnas da Glion vestgadira veglia per La Trucca. «Nus prendain tut – nus dumandain be, che la vestgadira saja schubra ed entira, ma quai è relativ», di Lucrezia Berther cun in rir. I para da dar tut en La Trucca: pullovers, rassas, giaccas, chautschas, chalzers. Vestgadira da marca, ma era chaussas bunmartgadas da paginas d'internet chinaisas sco Temu, declera Lucrezia Berther.
I dat da quels muments, nua che nus essan vi da scriver si u vi dad etichettar la rauba, nua che nus schain: ussa avain nus avunda, ussa basti lura.
In pèr meters sper la stizun ha La Trucca in magazin per lur vestgadira. Passa 100 stgatlas èn deponidas là, ma ina gronda part saja era la moda da stad, declara Lucrezia Berther. «Quellas chistas, quellas van lura davent, cur che la stagiun mida.»
-
Bild 1 von 4. Il magazin da La Trucca. Bildquelle: RTR.
-
Bild 2 von 4. Resti, ch'è da schleta qualitad, ma che l'uniun da dunnas na vul betg dar davent u metter en il rument. Bildquelle: RTR.
-
Bild 3 von 4. Bildquelle: RTR.
-
Bild 4 von 4. Bildquelle: RTR.
Quai ch'ellas na san betg vender suenter dus onns, tramettan ellas ad instituziuns caritativas. Cun la massa da donaziuns na sajan ellas anc betg al limit, ma mintgatant pensia ella schon, ch'i bastia prest.
Surabundanza en la Feschtland Brocki a Cuira
Paucs kilometers davent da Glion vesi dentant ora tut auter. En la brocki a Cuira han l'effect dal consum e la vestgadira da China tutgà tut in'autra dimensiun. Tenor la schefa Jasmin Simmen survegn la brocki mintga di radund 100 kilos vestgadira veglia. Mintga tschintgavel toc na pon els betg duvrar, sco ch'ella stima.
-
Bild 1 von 6. Bildquelle: RTR.
-
Bild 2 von 6. Qua vegn la vestgadira sortida. Bildquelle: RTR.
-
Bild 3 von 6. Bildquelle: RTR.
-
Bild 4 von 6. Qua vegnan deponids ils satgs, che vegnan tramess en autras terras – uschè plain e quel vagun suenter in di. Bildquelle: RTR.
-
Bild 5 von 6. Mantun da resti, che la brocki da Cuira na sa betg duvrar, suenter in'emna. Bildquelle: RTR.
-
Bild 6 von 6. Nua che quel resti va exact, na sa la manadra da la Feschtland Brocki Cuira, Jasmin Simmen, betg. Bildquelle: RTR.
Era questa vestgadira veglia vegn regalada a las instituziuns caritativas. Mintg'emna emplainan els in camiun cun vestgadira veglia ch'els tramettan lura davent. Nua che quai va? Ina dumonda difficila.
«Exact na savain nus betg, nua che la vestgadira va. Nus sperain ch'ella vegn en quest lieu, ch'els din a nus», di Jasmin Simmen. Quai saja ina discussiun delicata, manegia ella e menziuna ina documentaziun dad SRF davart las muntognas da vestgadira veglia a Ghana.
Nus essan ina part pitschna da tut quai – sch'ins guarda en l'entira Svizra, èn quai tonnas da vestgadira, containers plains... i n'è betg simpel.
Per il futur giavischa ella, che quellas textilias restian en Svizra e vegnian recicladas. In exempel stat gia en la Feschtland Brocki a Cuira. Sper la cassa stattan figuras ed animals da plisch, tastgas e ghirlandas giaglias, tuttas fatgas or da textilias veglias, dad umans cun impediments psichics.
-
Bild 1 von 3. Bildquelle: RTR.
-
Bild 2 von 3. Bildquelle: RTR.
-
Bild 3 von 3. Bildquelle: RTR.
La moda a la svelta, u per englais fast fashion, e las consequenzas dal consum da vestgadira èn pia er arrivadas tar nus en il Grischun. Ina soluziun ideala na pari anc betg da dar, ma la lavur vala tuttina la paina, da quai èn Jasmin Simmen e Lucrezia Berther persvadidas.