En total organisescha il museum quest onn 9 exposiziuns. Ina da quellas cun il visiunari da la Svizra tudestga Dieter Roth – in dals gronds artists universals svizzers dal 20avel tschientaner. In'autra è l'exposiziun «Clera notg» dad Ilse Weber. L'exposiziun en il museum d'art grischun è – suenter la presentaziun en la casa d'art a Turitg il 1992 – pir la segunda exposiziun individuala dad Ilse Weber. Quell'exposiziun duai dar ina survista davart l'ovra ed il success artistic da l'impressiunista ch'è morta il 1984.
Pitschna surpraisa la stad
Questa stad spetga alura ina pitschna surpraisa. L'exposiziun «Alberto Giacometti. Purtret da l'artist sco um giuven». In'exposiziun che skizzescha ils emprims onns da l'artist Alberto Giacometti, sco il co-directur dal museum d'art Stefan Kunz declera.
L'entschatta fa quella sonda però l'exposiziun «davart la valur da l'art» – nua ch'il museum d'art illustrescha la relaziun cumplexa tranter valur ed art.
