Suenter che Flurin Camenisch ha finì ses studi da biologia ha el emprim cumenzà da lavurar sco scolast secundar. Cun 30 onns ha el lura surpiglià la plazza sco zoolog e pedagog en il Museum da la natira. Quella plazza è vegnida introducida da nov dal chantun e Flurin Camenisch era damai l'emprima persuna che ha fatg questa lavur.
Ses temp en il museum
En il Museum da la natira grischun a Cuira ha Flurin Camenisch lavurà surtut en l'intermediaziun. El ha manà classas da scola tras il museum, ha manà guidas per persunas creschidas e famiglias ed ha organisà eveniments. El ha declerà animals, spazis da viver e connex en la natira – e quai adina en moda simpla, visibla e cun grond entusiassem.
Mintga giada datti novas situaziuns, dumondas u era respostas, tar las qualas ch'ins pensa – mamma mia quai è uschè bel.
Las ultimas duas exposiziuns spezialas ch'el po anc accumpagnar e ch'el ha l'entschatta da quest onn preschentà han per ina num «countdown da la vita» e «fastizs». Omaduas tematicas sa cunfan gist bain cun Flurin Camenisch. Er el lascha enavos blers fastizs: en il museum, tar collegas e tar tut ils visitaders e las visitadras a quals ch'el ha mussà e declerà la natira.
Sia professiun sco zoolog e pedagog en il Museum da la natira a Cuira va pia a fin, ma la fascinaziun per la natira e per ils animals resta probabel per adina. Lungurus na daventa il nov capitel damai segir betg.
Jau poss ir sin in prà e poss star là in mez di, e quai è per mai grond divertiment.
Ed er en il Museum da la natira grischun vai enavant. La successura per Flurin Camenisch è gia fixada. Quella persuna cumenzà lura in settember 2026.