Siglir tar il cuntegn

Header

audio
Favugn: Notg lunga da baselgias
Or da Actualitad dals 26.05.2023. Maletg: RTR
laschar ir. Durada: 4 minutas 10 Secundas.
cuntegn

Notg lunga da las baselgias Favugn festivescha fin mesanotg – e forsa pli ditg

Per la segunda giada ha la notg lunga da las baselgias lieu en il Grischun. Quai è ina festa internaziunala da cultura nua che las portas da diversas baselgias èn avertas fin a mesanotg. En Grischun èn quai 40 lieus e var 150 occurentas durant ina saira. Tranter auter datti concerts, referats, films e cults divins.

Favugn festivescha dubel

Durant la notg lunga da las baselgias vegn la baselgia renovada da Favugn inaugurada. Ina gronda part dal program è da preschentar la baselgia renovada: surtut è spezial ch'i na dat nagins banchins classics, dentant ina maisa lunga tras l'entira baselgia. Per exempel datti era in gir per guardar l'art che scolaras e scolars han fatg.

Per nus è il highlight che pudain inaugurar la baselgia ed il santeri.
Autur: Fadri Ratti reverenda Favugn

E la saira procuran l'artist Donat Caduff ed il schurnalist Claudio Spescha per risaglia. Cun lur program «Das Gelbe des Eis» prelegian els divers citats or da radunanzas communalas. Intginas èn era frasas che persunas da Favugn han ditg ad ina radunanza, quai fa in tic gnervus a Donat Caduff.

Jau sai betg tgi che sesa en il public, ed il public sa betg sch'el vegn avant en la producziun.
Autur: Donat Caduff artist

Dentant sa quai era esser legher sch'ins realisescha tgi che ha ditg in da quests citats. Impurtant per Donat Caduff è, da mantegnair il respect, pervia quai è era tut anonim.

RTR actualitad 18:30

Artitgels legids il pli savens