RTR: Valentin Schmed, tge è stada tia emprima impressiun cura che ti has udì il num da Markus Solinger?
Valentin Schmed: Sco emprim hai jau googlà il num da Markus Solinger, perquai che jau n'aveva anc mai udì quest num. Jau hai lura chattà magari spert differentas infurmaziuns sur dad el, dentant bainspert hai jau fatg la dumonda sch'i dettia forsa ina segunda persuna cun il medem num, quai che jau hai chattà dad el, na gieva betg propi ensemen cun mes maletg d'in secretari da la Lia Rumantscha.
Markus Solinger ina persuna che n'era forsa betg sin il radar, ina persuna ch'ins enconuscha forsa en la patria a Scuol, dentant betg en l'entira Rumantschia ed ina persunas che na vegn definitivamain betg or da l'uschenumnada petta rumantscha, ma or da l'industria da gas, quai fa surstar.
Exact, quai ha er fatg surstar mai. Ma cun studegiar in pau pli conscienziusamain sia biografia èsi vegnì pli e pli interessant. El ha gì pliras funcziuns da manar projects, ha experientscha d'elavurar strategias da communicaziun, da marketing e da svilup d'organisaziuns ed interpresas cun structuras cumplexas. E quai sin il palc naziunal ed internaziunal.
Per sia lavur futura sco nov secretari general vegn quai segir dabun ad el da savair, tge ch'i dovra per vegnir vinavant, per metter en moviment insatge nov, u er per pudair acceptar ed ir enturn cun resistenza. Ses satgados professiunal è en mintga ca emplenì bain cun bleras experientschas.
Markus Solinger ha 55 onns ed ha in grond satgados professiunal. Tge manca ad el?
El ha menziunà pliras giadas, ch'el haja ina relaziun stretga cun sia patria Scuol, e ch'el saja fitg savens a Scuol la fin d'emna e durant las vacanzas.
Dentant sto el anc emprender d'enconuscher il mund rumantsch cun tut sias atgnadads, cun tut las persunas che tiran ils fils, cun la politica e cun tut sias sfidas ch'èn denturn. Jau hai gì l'impressiun che tut ils temas virulents ch'occupan la Rumantschia, sco per exempel l'avegnir da la scola rumantscha u il tudestg che prenda en tschertas regiuns adina dapli suramaun. Quests problems paran dad esser stads ils davos onns pulit lunsch davent dal nov secretari general.
E quai aud'ins er en las respostas dad el cura che schurnalistas e schurnalists han pruvà da vegnir pli concrets e discurrer cun el davart plans u ideas concretas. Quellas mancan anc.
Tge impressiun generala ha Markus Solinger fatg oz davant las medias?
In punct ch'è tenor mai fitg impurtant è il carisma. Markus Solinger ha propi carisma, fa in'impressiun fitg simpatica e derasa er ina tenuta positiva. Jau sun persvadì che quests facturs loms èn savens gist uschè impurtants per vegnir a metter en moviment insatge e per vegnir da persvader auters per in'idea.
Sia preschentaziun è stada vardaivla e jau crai ad el, ch'el haja propi plaschair da sia nova incumbensa, ch'el vul muventar insatge e ch'el na vul betg quest post simplamain per avair il titel da secretari general u per cumplettar ses palmarès e per far carriera sfurzada, ma perquai ch'el ha simplamain plaschair e fieu.
Valentin Schmed
Manader programmaziun RTR
