Siglir tar il cuntegn

Header

cuntegn

Reacziuns elecziun da Solinger In secretari nunenconuschent, ma bunas speranzas tar las uniuns

Suenter l'elecziun da Markus Solinger sco nov secretari general da la Lia Rumantscha hai dà emprimas reacziuns.

L’Uniun dals Grischs

audio
Il nov secretari è liber da pregiudizis
ord Actualitad dals 25.04.2023. Maletg: RTR
laschar ir. Durada: 1 minuta 48 Secundas.

L’Uniun dals Grischs giavischa cleramain ina meglra collavuraziun tranter la Lia Rumantscha e l’Uniun dals Grischs. Fadrina Hofmann è commembra da la suprastanza da l’UdG e giavischa ina meglra collavuraziun cun las regiuns, ed ina meglra integraziun e communicaziun tranter questas duas uniuns. L’Uniun dals Grischs sa dat fadia da vulair daventar pli visibla tar il public rumantsch e quella finamira giavischa ella da realisar ensemen cun la Lia Rumantscha.

Il nov secretari n'ha naginas chargias veglias, uschia ch’el po propi sa focussar sin l’avegnir.
Autur: Fadrina Hofmann commembra da l'Uniun dals Grischs

Markus Solinger saja ina persuna betg propi enconuschenta en la Rumantschia. Per la commembra da l’Uniun dals Grischs pudess quai era avair in avantatg:

Uniun Rumantscha Grischun Central URGC

audio
Mussar preschientscha e savair tge idioms che vegnan discurrids.
ord Actualitad dals 25.04.2023. Maletg: RTR
laschar ir. Durada: 1 minuta 49 Secundas.

Per Gierina Michael, la suprastanta da l’Uniun Rumantscha dal Grischun Central (URGC) è Markus Solinger in nunenconuschent. Per ella dentant nagin problem, prendì il cas ch’il novelegì è ina persuna averta ch’è pronta da prender si contact cun las uniuns affiliadas. Per ella èsi impurtant ch’el mussia er preschientscha e ch’el sappia tge idioms che vegnian discurrids en las regiuns, e co che las situaziuns linguisticas sa preschentian.

In engaschi spetga ella era quai che pertutgia ils meds d’instrucziun, per avair lectura adattada era per la Val Schons. Cudeschs che la Lia Rumantscha e la Renania hajan edì sajan exausts, per famiglias na dettia quai il mument betg blers cudeschs. Era in sustegn per l’activaziun da la Tumleastga e la Mantogna, giavischass Gierina Michael. Era pertutgant la problematica da la mancanza da scolastas e scolasts spera la URGC sin sustegn dal nov secretari general da la Lia Rumantscha. Impurtant saja era ch’il nov secretari na veglia betg immediat midar tut quai che saja sa cumprovà.

La Surselva Romontscha

audio
impurant ch’il secretari s’engaschia per il dialog cun las uniuns
ord Actualitad dals 25.04.2023. Maletg: RTR
laschar ir. Durada: 2 minutas 18 Secundas.

L’elecziun da Markus Solinger è ina surpraisa per Toni Vinzens, il president da la Surselva Romontscha. Il num saja nunenconuschent ed el n'haja insumma betg quintà cun questa elecziun. Legend il profil dal nov secretari general quinta el dentant ch’el correspundia a las finamiras da la Lia Rumantscha. Impurtant per la Surselva Romontscha restia la collavuraziun e ch’il secretari general s’engaschia per il dialog cun las uniuns affiliadas.

Uniun da las Rumantschas ed ils Rumantschs en la Bassa (URB)

audio
Bun d’avair ina persuna ch’enconuscha las sfidas da Rumantschs en la Bassa.
ord Actualitad dals 25.04.2023. Maletg: MAD
laschar ir. Durada: 7 minutas 25 Secundas.

La Lia Rumantscha stoppia far il pass vers il futur, la digitalisaziun, il marketing ed esser preschenta sin tut ils chanals pussaivels. Markus Solinger haja qua las cumpetenzas correspundentas e vegnia a far bain a l’organisaziun tetgala, di Roman Pfister che sesa en la suprastanza da la Lia Rumantscha. Il medem mument è el era il president da l’Uniun da las Rumantschas ed ils Rumantschs en la Bassa ed enconuscha Markus Solinger gia dapi blers onns sco commember da l’URB. Ch’il nov secretari general viva e lavura dapi decennis en la Bassa na vesa Pfister betg sco dischavantatg. Anzi – bleras Rumantschas e blers Rumantschs vivian en la diaspora ed i saja segir bun d’avair a la testa da la Lia ina persuna cumpetenta ch’enconuschia la situaziun da viver e las sfidas da las Rumantschas ed ils Rumantschs en la Bassa. Roman Pfister giavischa perquai era dapli engaschi da la Lia en la Bassa. Quai en furma d’occurrenzas localas ma er cun mussar dapli preschientscha, per exempel en furma d'in represchentant en la Bassa.

RTR actualitad 17:00

Artitgels legids il pli savens